Meta i kërkon Hungarisë të ndikojë në arritjen e konsensusit brenda BE
Çelja e negociatave për Shqipërinë, presidenti takon homologun hungarez
Presidenti
i Republikës, Ilir Meta u prit dje, në Hungari nga Presidenti i Republikës së Hungarisë, János Áder, në Sheshin Szent György. Pas ceremonisë së lartë zyrtare, Meta diskutoi me homologun e tij. Presidenti Meta shprehu, gjithashtu, mirënjohjen për mbështetjen e qartë dhe konsistente të Hungarisë për integrimin e Shqipërisë në Bashkimin Europian. Presidenti kërkoi mbështetjen e Hungarisë për arritjen e konsensusit brenda Këshillit të BEsë dhe mbështetjen e rekomandimit të Komisionit për çeljen e negociatave të anëtarësimit të Shqipërisë në Bashkimin Europian. Duke u ndalur në bashkëpunimin dypalësh, Presidenti Meta nënvizoi faktin se bashkëpunimi ekonomik e tregtar duhet t'i përgjigjet marrëdhënieve të shkëlqyera politike dhe potencialeve që dy vendet kanë, si në pasuri natyrore ashtu dhe në ato njerëzore. Rivendosja e linjës direkte ajrore midis kryeqyteteve të të dy vendeve dhe hapja e Dhomës së Tregtisë së Hungarisë në Tiranë do të bëjnë që ky bashkëpunim të rritet ndjeshëm dhe që pas katër viteve ta festojmë 100- vjetorin e vendosjes së marrëdhënieve diplomatike me rezultate shumë pozitive edhe në këtë drejtim, - nënvizoi Presidenti Meta. Më tej ata u ndalën edhe në zhvillimet më të fundit në rajonin e Ballkanit Perëndimor, si dhe sfidat e kërcënimet me të cilat vendet e këtij rajoni po përballen. Presidenti hungarez Áder e siguroi Presidentin Meta për mbështetjen e Hungarisë, si në drejtim të integrimit europian, ashtu edhe për nxiten e mëtejshme të bashkëpunimit ekonomik midis dy vendeve. Gjatë kësaj vizite zyrtare Meta pati takime edhe me kryeministrin dhe kryetarin e parlamentit hungarez.