Edi Rama paralajmëron kryebashkiakët: Shurdhë e indiferentë, do publikoj emrat
Kryeministri
Edi Rama kritikoi dje, bashkitë gjatë një takimi me qytetarë dhe bashkëpunëtorët e platformës së bashkëqeverisjes. Gjatë diskutimit të rasteve që kanë gjetur zgjidhje përmes platformës, Rama tha: "fatkeqësisht nuk jemi dot në lartësinë e duhur, kur vjen puna tek njësitë vendore. Bashkitë nuk përgjigjen shpesh në kohë dhe kjo është për të ardhur keq, sepse faktikisht janë institucionet që për natyrë, përveçse për ligj, janë më pranë njerëzve e komuniteteve dhe e vetmja zonë konflikti që kemi me qytetarët, herë pas here, jo për faj të tyre, është kur ata shkruajnë për çështje vendore që janë përgjegjësi e bashkive". Sipas Kryeministrit, "pjesa e Zyrës së Bashkëqeverisjes që mbulon pushtetin vendor bën të njëjtën punë që bën për çdo rast me pushtetin qendror, por has shpesh në shurdhëri dhe në indiferencë. Nuk kam dashur që t'i bëj publike rastet dhe nuk kam dashur që të publikoj drejtpërdrejtë emrat konkretë të bashkive dhe të kryetarëve të bashkive, por dua të them që do të jem i detyruar ta bëj këtë gjë, meqë zotërinjtë, - kryesisht janë zotërinjtë ata që nuk përgjigjen, zonjat kryetare bashkie janë më reaguese në përgjegjësi, - kanë edhe ambicien që të zgjidhen përsëri. Kështu që do të duhet ta llogarisin nga sot se do duhet të ballafaqohen publikisht me rastet që qytetarët referojnë në platformë dhe këta nuk duan të dinë fare dhe nuk përgjigjen". Kryeministri tha më tej, se "është e vetmja gjë që na ka mbetur, pasi koordinatorët që merren me bashkitë janë kthyer në lutësa. Luten më shumë sesa besimtarët që shkojnë në kishë apo në xhami dhe, nëse ata kanë një lutje drejtuar Zotit dhe e vlerësojnë ata sesi e marrin përgjigjen, lutjet e koordinatorëve të bashkëqeverisjes për bashkitë janë lutje drejtuar të zgjedhurve, që nuk përgjigjen". Kjo duhet të mbarojë, së paku si përgjegjësi e jona, si përgjegjësi e platformës. Po cenojnë reputacionin e platformës, që ne duam të jetë një reputacion pa asnjë cen dhe për këtë punohet ditë e natë".