I riu vdiq në komisariat, ekspertiza: Enea Ftoj nuk u dhunua nga policia
"Kërkojmë zhvarrosjen e trupit. Nëse nuk zbardhet e vërteta, do bëjmë vetëgjyqësi" Reagojnë familjarët: Djali u rrah barbarisht
Enea Ftoj, i cili një muaj më parë u gjet i vdekur në ambientet e paraburgimit të Korçës nuk ka humbur jetën për shkak të dhunës së policisë, siç pretendojnë familjarët e tij. Ekspertiza mjekoligjore ka dalë në konkluzionin se ndaj tij nuk është ushtruar dhunë. Ky konkluzion është bërë dje me dije për median nga zv. ministrja e Brendshme, Romina Kuko; zv. drejtorja e Policisë së Shtetit Aida Hajnaj dhe Drejtorja e Shërbimit të Çështjeve të Brendshme dhe Ankesave ( SHÇBA) Anila Trimi, të cilat ishin në familjen e të ndjerit për të ofruar mbështetje dhe ndihmë në bashkëpunim me pushtetin lokal. "Do t'u qëndrojmë pranë familjarëve me sa të mundemi," është shprehur Kuko. Ndërsa, Anila Trimi deklaroi se sipas ekspertizës, i riu nuk ka humbur jetën nga dhuna e policisë. "Sot ( dje) është e provuar shkencërisht nga Instituti i Mjekësisë Ligjore që ndaj shtetasit Enea Ftoji nuk është ushtruar dhunë fizike nga punonjësit e Policisë së Shtetit. Ne do të vazhdojmë hetimet e mëtejshme në lidhje me këtë rast",- është shprehur drejtoresha e SHÇBA. Ndërkaq, familjarët e 27- vjeçarit ( baba i dy fëmijëve) është e bindur se Enea humbi jetën për shkak se është dhunuar nga policët që në momentin e ndalimit ( dyshohej për vjedhje) dhe më pas në komisariat. Lajmi për rezultatin e ekspertizës ka tronditur familjarët, të cilët deklaruan se e mësuan nga media.
REAGIMI I FAMILJARËVE
"Nuk kemi dijeni për rezultatet e ekspertizës. Nga mediat mësuam që policia thotë se vdekja e Eneas ishte natyrore dhe nuk është ushtruar dhunë nga policët. Djali vdiq në komisariat nga dhuna e policisë. E rrahën edhe kur e shoqëruan edhe në ambientet e komisariatit. Policia fshehu dhunën",thanë prindërit e viktimës. Ndërkaq, i ati i 27- vjeçarit pohoi se "im bir është dhunuar barbarisht. Isha vetë në morg dhe i pashë shenjat në trup dhe fytyrë. Unë i bëra foto djalit dhe në fytyrë kishte të ënjtura dhe shenja. Jemi të bindur që është dhunuar. Do të bëjmë zhvarrosjen e trupit dhe të bëhet përsëri ekspertizë. Nëse nuk do zbardhet e vërteta do bëjmë vetëgjyqësi. Fëmijët e Eneas i mori nusja dhe ka ikur nga shtëpia. Nuk na ka ndihmuar askush. Gjakun e djalit nuk ma blen askush". 27- vjeçari Enea Ftoj ndërroi jetë më 17 maj në ambientet e paraburgimit të Korçës, ku kishte 3 ditë që qëndronte pasi ishte ndaluar për vjedhje. Ditën kur ndodhi ngjarja, i riu duhej të dilte në sallën e gjyqit për akuzën që rëndonte ndaj tij. Ndonëse familjarët e prisnin atë në sallën e gjyqit, ata u njoftuan se ai kishte ndërruar jetë. Pas ngjarjes, familjarët e viktimës hodhën akuza të rënda për policinë. Ata akuzojnë efektivin Arqile Ropi, pasi pretendojnë se ai ka ushtruar dhunë ndaj Eneas dhe për pasojë ai ka humbur jetën.