Parlamenti i Holandës vendos: Jo çelje negociatash për Shqipërinë
Diskutime të gjata në parlamentin holandez, votojnë kundër 125 deputetë Franca ende skeptike, "Der Standard": Opozita po lobon kundër
Parlamenti i Holandës i ka thënë ' Jo' hapjes së negociatave për Shqipërinë. 125 deputetë nga shumica dhe opozita kanë votuar mbrëmë kundër çeljes së negociatave për Shqipërinë dhe Maqedoninë, duke zvogëluar kështu mundësinë për të marrë një lajm të mirë më 28- 29 qershor. Vendimi i parlamentit holandez për mocionin e paraqitur nga Komisioni për Çështjet me Europën është marrë dje pasdite pas diskutimeve të gjata, rreth një orë e 40 minuta mes përfaqësuesve të partive politike në këtë komision. Në përfundim, burime nga mbledhja thanë se mund të ketë një dëgjesë të ngjashme në ditët në vijim. Në sallën e Komisionit për Çështjet e Europës ndodhej edhe ambasadorja e Shqipërisë në Holandë, Aida Sakiqi. Ndërkohë dje, gazeta holandeze "De Telegraaf" paralajmëroi votë kundër të Holandës në takimin e liderëve të vendeve të BE- së në Bruksel në 28 dhe 29 qershor. Në një shkrimin me titull "Holanda bllokon pranimin e Shqipërisë në BE" thuhet se shumica e partive të parlamentit holandez janë kundër hapjes së negociatave dhe shkak për këtë janë bërë shqetësimet për krimin e organizuar dhe korrupsionin. "Shumica e partive të parlamentit holandez e dërgon qeverinë e Holandës në Bruksel me mesazhin e qartë për të mos votuar pro hapjes së negociatave. Shqipëria, vendi ballkanik i goditur nga varfëria u bë kandidat për anëtarësim në BE disa vjet më parë me miratimin e Dhomës së Përfaqësuesve. Komisioni Europian tani dëshiron të nisë negociatat për anëtarësim me Shqipërinë dhe Maqedoninë. KE madje përmend një vit në të cilin anëtarësimi duhet të jetë një fakt, 2025", shkruan gazeta.
Gazeta "De Telegraaf" citon ministrin e Jashtëm holandez, i cili deklaron: ' Ne kemi shqetësime serioze në lidhje me luftën kundër korrupsionit dhe krimit të organizuar - duke shtuar se - më shumë përparime duhet të bëhen në këto çështje". Megjithatë, ai ende nuk e mbyll derën për Shqipërinë. Partitë të deklaruara kundër hapjes së negociatave në parlamentin holandez janë 5, VVD, CDA, CU, PVV dhe PS 50Plus. Një prej deputetëve të CDA, Van Helvert
në prononcimin për gazetën pranon ndikimin rus dhe atë kinez në rajon, por sipas tij, kjo nuk është një arsye për të bërë pazare me parimet dhe standardet europiane. Vetëm dy forca politike parlamentare D66 dhe GroenLinks duan që BE të fillojë bisedimet me Shqipërinë dhe Maqedoninë. Arsyetimi është se vërtet Shqipëria nuk është gati për Europën, por hapja e negociatave nuk është anëtarësim në Bashkimin Europian. Partitë besojnë se vendet do të kujdesen mirë për sundimin e ligjit, qasjen ndaj krimit dhe luftën kundër korrupsionit nëse kanë një perspektivë të qartë të pranimit.
FRANCA
Ndërsa Franca vijon të jetë skeptike lidhur me hapjen e negociatave të Shqipërisë në
BE. Shkak për këtë është korrupsioni në sistemin gjyqësor, ku sipas mediave franceze, reforma në radhët e prokurorëve dhe gjyqtarëve po nxjerr në pah të korruptuarit. Në një shkrim kushtuar gjyqësorit, "Der Standard" bën një përmbledhje të gjithçkaje ka ndodhur në sistemin e drejtësisë në Shqipëri, ku deri më tani 19 gjyqtarë dhe prokurorë nuk kanë mundur të shpjegojnë pasuritë e tyre dhe kanë dhënë dorëheqjen, ndërsa 7 janë shkarkuar nga detyra. "Megjithatë, ka rezistencë në shtetet e BE kundër fillimit të bisedimeve të pranimit në BE me Shqipërinë. Kjo vjen kryesisht nga Franca, por edhe nga Danimarka dhe Holanda. Ndonëse këta të fundit kanë gjasa ' të kthejnë'
kur të gjithë të tjerët po tërhiqen, është ende e mundur që Parisi të votojë kundër shqyrtimit të kapitujve të parë të BE- së për Shqipërinë në samitin e 28 dhe 29 qershorit", vijon shkrimi. "Udhëheqësi socialist Edi Rama gjithashtu ka disa miq të partisë në BE, sepse shumica e vendeve të BE- së qeverisen nga konservatorët. Opozita në vendin e vet, Partia Demokratike ( PD), ashtu siç është aq e zakonshme në Ballkan, refuzojnë të përgëzojnë qeverinë dhe lobon në BE kundër fillimit të negociatave. Gjithashtu, në CDU dhe CSU ka njerëz që janë kundër bisedimeve të pranimit. Megjithatë, Merkel ka fjalën e fundit dhe kancelaria është në favor", thuhet në shkrimin e "Der Standard".