Meta merr garancinë e Orbán: Hungaria do të bëjë çdo gjë për negociatat
Presidenti i Republikës pritet nga zyrtarët hungarezë
Presidenti
Meta i shpre hu dje mirënjohjen Kryeministrit dhe kryeparlamentarit të Hungarisë për mbështetjen domethënëse e pa rezerva që i kanë dhënë Shqipërisë për çeljen e negociatave të anëtarësimit në BE. Gjatë takimit me Kryeministrin e Hungarisë, Viktor Orbán, ndërsa vlerësoi raportet e mira mes vendeve shprehu besimin se rivendosja e linjës direkte ajrore midis kryeqyteteve të të dyja vendeve dhe hapja e Dhomës së Tregtisë së Hungarisë në Tiranë do të bëjnë që ky bashkëpunim të rritet ndjeshëm dhe që pas katër viteve Shqipëria dhe Hungaria ta festojnë 100- vjetorin e vendosjes së marrëdhënieve diplomatike me rezultate konkrete e domethënëse. Kryeministri Orbán e siguroi Presidentin Meta për mbështetjen e vazhdueshme të qeverisë së tij për Shqipërinë dhe shqiptarët si dhe forcimin e mëtejshëm të miqësisë historike midis dy popujve. "E sigurova Shkëlqesinë e Tij se Hungaria është një nga mbështetëset kryesore të integrimit perëndimor të Shqipërisë, sidomos të anëtarësimit në Bashkimin Evropian. Hungaria dhe ne personalisht do të bëjmë çdo gjë për ta përshpejtuar atë proces dhe t'ua bëjmë të qartë udhëheqësve evropianë se anëtarësimi i Shqipërisë në Bashkimin Evropian nuk është i rëndësishëm vetëm për Shqipërinë. Nuk është i rëndësishëm vetëm për rajonin, por është bindja ime personale se është i rëndësishëm edhe për vetë BE- së, sepse Shqipëria si një vend i ri anëtar, mund t'i japë energji pozitive, ambicie dhe një shtysë të re Bashkimit Evropian, gjëra për cilat patjetër që kemi nevojë", tha Orbán. Edhe kryeparlamentari hungarez Kövér e siguroi Presidentin Meta se Parlamenti hungarez do vijojë ta mbështesë Shqipërinë pa asnjë rezervë në aspiratën e saj evropiane.