Takimi Rama- Tsipras në korrik, hiqet "Çamëria" nga pakti mes dy vendeve
Mediat
greke lajmëruan dje finalizimin e një mar rëveshjeje mes Greqisë dhe Shqipërisë, përmes së cilës zgjidhen problemet e vjetra mes dy vendeve. Por sipas tyre, në këtë marrëveshje nuk përmendet fjala "Çamëri". Tashmë është bërë e qartë se dy palët janë dakord plotësisht për abrogimin e ligjit të luftës, por duket se për Çamërinë kanë rënë nën presionin e një pjese të politikës greke, që ia ka vënë këtë si kusht kryeministrit Aleksis Tsipras. Ka qenë zyra e kryeministrit grek, që ka shpërndarë në media detaje se fjala "Çamëri" nuk përmendet në marrëveshje. Ende nuk ka saktësime për marrëveshjen e detit, por ndërkohë në këtë marrëveshje flitet për njohjen e patentave shqiptare dhe greke, heqjen e vulës apostile si dhe të drejtat e minoriteteve. Po nga media greke thuhet se kryeministrit Edi Rama e Tsipras mund të takohen në Bruksel. Më pas, marrëveshja pritet të marrë firmat e Ramës dhe Tsipras në mesin e korrikut. Parashikohet që marrëveshja të nënshkruhet në ishullin e Korfuzit, citon "Report TV". Grupi negociator shqiptar ka kërkuar që marrëveshja të marrë miratimin e parlamentit grek e më pas të firmoset nga dy kryeministrat. Formati i marrëveshjes do të mbajë si logo atë të Partneritetit Strategjik, ndërsa Traktati i Miqësisë Shqipëri- Greqi do të rinovohet në vitin e ardhshëm. Ndërkohë dje, ministri për Evropën dhe Punët e Jashtme, Ditmir Bushati shkoi në Konferencën e Tretë për Siguri dhe Stabilitet, në Rodos. Aty ka pasur edhe një takim me homologun e tij, Nikos Kotzias. Në fjalën e tij, Bushati u ndal tek nevoja e bashkëpunimit mes vendeve, në përballjen me sfidat aktuale të sigurisë.