AMF: Siguruesit të paguajnë menjëherë 7 milionë euro
Problemet e sigurimeve, AMF raporton në Kuvendin e Shqipërisë Pagesat e prapambetura nga viti 2001 e në vazhdim
Drejtor i përgjithshëm ekzekutiv i AMF- së, Ervin Koçi raportoi në Kuvendin e Shqipërisë dhe bëri të ditur se tregu i sigurimeve ngelet i pazhvilluar dhe problematik në drejtim të standardeve të qeverisjes dhe menaxhimit. Çështja më e vështirë ngelet trajtimi dhe shlyerja e dëmeve nga Byroja Shqiptare e Sigurimeve, që është përgjegjëse për dëmet e shkaktuara nga mjetet e pasiguruara. Me gjithë presionin në rritje, Byroja ende nuk ka shlyer plotësisht dëmet e prapambetura dhe nuk ka caktuar një shoqëri ndërkombëtare për auditimin e veprimtarisë së saj, siç kishte urdhëruar AMF. Veç probleme të tjera, AMF nuk po arrin as të miratojë një drejtor të Byrosë Shqiptare të Sigurimeve, i cili të përmbushë kriteret ligjore. Pas shumë përpjekjesh, në muajin maj, asambleja e anëtarëve të Byrosë paraqiti një kandidaturë për miratim në AMF, siç parashikohet në ligj. Por, kandidatura e drejtorit të komanduar, Kevin Lleshi, u refuzua në fillim të qershorit nga Bordi i AMFsë, për shkak se ai ka qenë subjekt i masave administrative dhe në mënyrë të përsëritur nuk ka zbatuar vendime të marra nga Autoriteti Mbikëqyrës. Problematika e mbartur nga viti 2001, me pagesat e prapambetura me Fondin e Kompensimit duket se po shkojnë drejt zgjidhjes. Vendimi i marrë mbi Fondin e Kompensimit për vitin 2018 nga Bordi i Autoritetit të Mbikëqyrjes Financiare, në mbledhjen e datës 28 dhjetor 2017, vjen në funksion të mbrojtjes së interesave të konsumatorëve, çka i jep zgjidhje një problematike të mbartur nga viti 2001. Tashmë këto dëme i përkasin aksidenteve të shkaktuara nga makina të pasiguruara ose të paidentifikuara.
VLERËSIMET
Sipas vlerësimeve masa e Fondit të Kompensimit për detyrimet e mbartura dhe që do të lindin për vitin 2018 vlerësohet rreth 1.8 miliardë lekë, e ndarë: 1.25 miliardë lekë për ngjarjet nga viti 2001 deri 31.12.2013 ku përfshihen detyrime të papaguara, që janë në proces trajtimi apo proces gjyqësor pa vendim të formës së prerë; 418 milionë lekë për ngjarjet nga viti 2014 deri në 31.12.2017 ku përfshihen detyrime të papaguara, që janë në proces trajtimi apo proces gjyqësor pa vendim të formës së prerë, dhe jo më pak se 150 milionë lekë për ngjarjet që mund të ndodhin gjatë vitit 2018. Bordi i AMFsë ka urdhëruar Byronë Shqiptare të Sigurimit që të nd- jekë procedurën e shlyerjes së menjëhershme të detyrimeve të papaguara të praktikave të dëmeve objekt i Fondit të Kompensimit, për të cilat ka përfunduar procesi i trajtimit ( përmbarimor, me vendim gjykate të formës së prerë dhe të miratuara, por të papaguara) në vlerën totale 923 354 758 lekë për ngjarjet e sigurimit nga data 01.01.2001 deri në 31.12.2017.
BORXHI I RI
Njëkohësisht, për të mos krijuar borxh të ri, Bordi i AMF- së vendosi krijimin e Fondit të Kompensimit për vitin 2018, minimalisht në masën 895 203 094 lekë, i ndarë: 745 203 094 lekë për shlyerjen e detyrimeve për ngjarjet nga 1 janar 2001 deri në 31 dhjetor 2017 ( që janë në
proces trajtimi apo procese gjyqësore, pa vendim të formës së prerë) dhe jo më pak se 150 milionë lekë për ngjarjet që mund të ndodhin gjatë vitit 2018. Vendimi bën të mundur që çdo qytetar që gjatë vitit 2018 fiton një vendim të formës së prerë nga gjykatat ose i miratohet nga shoqëritë e sigurimit, do të paguhet brenda vitit 2018. Autoriteti, ashtu si në shumë vendime të marra gjatë vitit 2017, do të vazhdojë të fokusohet tek mbrojtja e interesave të konsumatorëve dhe e konsideron shlyerjen e detyrimeve të Fondit të Kompensimit si një ndër prioritetet kryesore të veprimtarisë së tij gjatë vitit 2018, edhe pse këto detyrime kanë filluar të mbarten prej vitit 2001.