"Do t'u bëjmë thirrje shqiptarëve të bojkotojnë produktet greke"
PDIU e shoqata "Çamëria" kërkojnë shpjegime nga Bushati e Kotzias
Pas
deklaratës së min istrit të Jashtëm grek se nuk ka pasur diskutime për çështjen çame gjatë negociatave me Shqipërinë, PDIU dhe shoqata "Çamëria" deklaruan se do t'u bëjnë thirrje shqiptarëve të protestojnë. "Ne do t'u bëjmë thirrje shqiptarëve të bëhen pjesë e një proteste civile, e që në fillim të bojkotojnë produktet greke në treg dhe bankat greke si hapin e parë, por që më pas do ketë shumë forma të tjera më të ashpra e radikale", thuhet në deklaratën e çamëve. "Kjo mospërfshirje e çështjes çame kërkon shpjegime dhe reagim të menjëhershëm nga qeveria shqiptare dhe Ministria e Jashtme, sepse bëhet fjalë jo vetëm për një çështje kombëtare e me ndjeshmëri të lartë për të gjithë shqiptarët, po në veçanti për një kauzë njerëzore, e cila prek qindra- mijëra familje, viktima të gjenocidit", thuhet në deklaratë. "Ne kërkojmë që z. Bushati të plotësojë me përgjegjshmëri kushtetuese e njerëzore detyrimet e tij. Shoqata ' Çamëria' e PDIU është e gatshme ta asistojë e të jetë pjesë e këtyre bisedimeve, por deklarimi se pala greke nuk pranon bisedimet është justifikim i pamoralshëm e tradhti e çështjes kombëtare", shprehen çamët. "Ftojmë z. Kotzias të jetë i kujdesshëm në deklarimet e tij e mos të jetë i vetëkënaqur sepse çështjen çame, çamët, të vrarët, gjykatat ndërkombëtare, por edhe gjyqin e historisë do t'i ketë përballë gjithmonë, e duhet ta ketë fort të qartë, se jo gjithmonë do ketë përballë shtetarë servilë e të intimiduar që tjetër thonë në Tiranë, e tjetër në Athinë".