EMERGJENCË, PËRMBYTET BIBLIOTEKA KOMBËTARE, LAGEN 12 MIJË NJËSI
Ndërsa
Opera është në rikonstruksion, e Teatri Kombëtar në zgrip të mbijetesës mes protestash e kanosjes për t’i vënë kazmën, krahas sheshit “Skënderbej”, është përmbytur edhe Biblioteka Kombëtare. Lajmin e ka konfirmuar vetë ajo përmes një komunikate për mediat ku bën me dije se 12 mijë njësi bibliotekare janë dëmtuar nga uji. “Biblioteka Kombëtare njofton se në orët e para të datës 23 qershor 2018, mbas reshjeve të vrullshme të shiut, është konstatuar prani uji në një nga sallat e saj në katet e nëndheshme të hapësirave depozituese të koleksioneve bibliotekare ( libra, revista, gazeta), duke dëmtuar/ lagur materialet bibliotekare të sistemuara në nivelet e ulta të sallës”, thuhet në komunikatën e shpërndarë mediave. Më poshtë sqarohet se “institucioni shpalli gjendjen e emergjencës për trajtimin e materialeve bibliotekare të lagura ose pjesërisht të lagura me qëllim tharjen dhe restaurimin e tyre të plotë”. Biblioteka Kombëtare thekson se nuk janë prekur mjediset ku ruhet fondi i Vlerave të rralla dhe Arkivi i librit e i periodikut shqip. “Nga të dhënat paraprake, numri i njësive bibliotekare me gjurmë lagështire rezultoi rreth 12 mijë. Gjatë punës së deritanishme janë tharë plotësisht rreth 70% e tyre. Vijon puna intensive për tharjen e plotë të pjesës së mbetur”, shton komunikata. Sipas saj, mbizotërojnë tekstet mësimore dhe botime të 15 viteve të fundit, të cilat për shkak të mungesës së theksuar të hapësirave depozituese nuk kanë mundur të ruhen sipas standardeve tekniko- profesionale. “Në funksion të kësaj emergjence dhe në respek- tim të protokolleve profesionale, njoftojmë se Biblioteka Kombëtare do të qëndrojë e mbyllur nga data 25 deri 30 qershor”, përfundon njoftimi. Kujtojmë se në datë 15 mars 2017, Biblioteka Kombëtare u përfshi nga flakët, zjarri ra në katin e nëndheshëm, ndërsa u dëmtuan disa materiale, ndërsa para dy ditësh e njëjta hapësirë u përmbyt nga reshjet e shiut.