Shtyrja e negociatave, Basha: Refuzim ndaj Ramës, do ta rrëzojmë
Kreu i PD, ambasadorëve: Keni dhënë dëshmi të rreme, jeni njësh me propagandën e Ramës "Klika e tij e inkriminuar sundon mbi shqiptarët"
Kreu i opozitës, Lulzim Basha e konsideroi dje një lajm të hidhur për shqiptarët moshapjen e negociatave, duke bërë përgjegjës direkt kryeministrin Edi Rama për refuzimin, por me garancinë se shqiptarët do ta rrëzojnë atë për t'i hapur rrugën anëtarësimit në BE. Vendimi i Luksemburgut, për Bashën, mbylli sërish dyert e Unionit për Shqipërinë, duke mos i hapur negociatat. Ndaj, Lulzim Basha zgjodhi dje një konferencë për shtyp për të thënë se s'ka as datë për çeljen e tyre. "Shqipërisë nuk i janë hapur negociatat me BE- në. Nuk ka as vendim as datë për hapjen e negociatave. Këshilli Europian nuk do ta shqyrtojë fare nesër ( sot) çështjen e hapjes së negociatave dhe e ka shtyrë këtë vendimmarrje të paktën për një vit, për në qershor 2019", theksoi z. Basha. Mesazhin e BE- së e lexon jo vetëm ndryshe nga kryeministri Rama, por edhe nga ambasadorët e huaj. "Unë nuk komentoj deklaratat e diplomatëve, por dështimi i sotëm është edhe i atyre, që u bënë njësh me Edi Ramën dhe s'e panë krimin e drogën. Kjo është fatura e gënjeshtrave dhe mashtrimeve të atyre që i bënë", tha kreu i opozitës. Moshapjen e negociatave e sheh si refuzim të qeverisë dhe lidhjeve që thotë se ajo ka me krimin e korrupsionin. "Është refuzim personal ndaj Edi Ramës dhe klikës së inkriminuar që sundojnë mbi shqiptarët. Është refuzim i Saimir Tahirit, Fatmir Xhafajt, Taulant Ballës, Damian Gjiknurit, Arben Ahmetajt, Vangjush Dakos, Qazim Sejdinit, Elvis Rroshit dhe kupolës politike të PS, pothuajse e gjitha e lidhur me krimin dhe me drogën", theksoi z. Basha. Sipas tij, nuk ka gjasë që negociatat të hapen as në qershorin e vitit 2019. "Sjellja e Ramës edhe pas refuzimit për hapjen e negociatave duke mashtruar pa turp shqiptarët tregon qartë se Edi Rama nuk ka për të përmbushur asnjë nga kushtet për t'i hapur negociatat as në vitin 2019. Zgjedhja e tij nuk është Europa, por krimi, korrupsioni dhe droga", theksoi z. Lulzim Basha. Në kushtet e një vendimmarrje refuzuese nga BE thotë se vendit i duhet një kthesë, ndonëse tregohet hermetik për aksionin opozitar. "Në javët e muajt e ardhshëm ne do të na duhet të reflektojmë thellë për "Pas reve ka dritë, ne e dimë se ka vetëm një rrugë për të marrë vendin në zemër të Evropës, të përballemi me të vërtetën, është qeveria e Ramës ajo që na mban larg Evropës. Në emër të PD- së i siguroj shqiptarët se opozita do të bëjë gjithçka për të çliruar nga kjo e keqe e madhe që të realizojmë bashkë anëtarësimin e vendit në BE", tha z. Basha.