Negociatat për Shqipërinë, zbardhen prapaskenat e kompromisit

tri ditësh negociata intensive në Luksemburg e Bruk sel, BE vendosi të çelë negociatat me Shqipërinë dhe Maqedoninë në qershor të vitit të ardhshëm. 25 shtetet e rreshtuara në krah të Shqipërisë e të Maqedonisë nisën të studiojnë opsionin e një deklarate të përbashkët politike dhe kancelarja Merkel mblodhi grupin e saj parlamentar, të cilit i komunikoi dështimin e negociatave me Francën e me Holandën, duke lënë të kuptohet se në këto kushte, presidenti Tusk nuk mund ta vendostë këtë çështje në axhendën e 28 qershorit, si pikë diskutimi mes liderëve. Në të njëjtën kohë, kryeministri Rama dhe ministri Bushati mësohet se kanë zhvilluar të martën një seri bisedash telefonike me Berlinin, Parisin dhe Hagën dhe kanë qenë në komunikim të pandërprerë me Italinë, Greqinë e disa vende të tjera në krah të Shqipërisë. Mes precedentit të krijuar nga Këshilli Europian me Malin e Zi, ku data është dhënë 6 muaj nga vendimmarrja e këshillit me disa kushte për t'u plotësuar dhe precedentit që do të krijohej nga Franca dhe Holanda në këtë rast, ku këshilli nuk do të vendoste asnjë datë por thjesht do të rreshtonte kushte për t'u plotësuar në vazhdim, deri pasdrekën e të martës u krijua ideja se përfundimi do të ishte nul, as datë, as kushte, po as diskutim në Këshillin Europian, çka do ta shtynte në kalendat greke procesin. Zgjidhja e kompromisit erdhi në minutën e fundit, kur Franca ka hedhur papritur në tryezë një tekst të ri, me një afat gjashtë muaj më të gjatë se sa precedenti malazez, por me pranimin e vënies në lëvizje të mekanizmit përgatitor, që zakonisht zbatohet jo përpara, por pas datës së përcaktuar.