Hetimi i 3.4 mln eurove, shpallen në kërkim ndërkombëtar Alfred dhe Elvis Vladi
Katër të arrestuarit kyçin gojën para prokurores. Policia: Dyshime për përfshirje të personave të tjerë në histori Autoritetet u kërkojnë ndihmë homologëve belgë, gjermanë e italianë
Në kuadër të zhvillim it të hetimeve për kapjen dhe sekuestrimin e 3.4 milionë euro në portin e Durrësit mesditën e së dielës, 4 të arrestuarit e kësaj c çështjeje kanë dalë ditën e djeshme para prokurorëve. Konkretisht Agim Çeka, Edi Lika, Klevi Lika dhe Alban Mollaymeri janë pyetur nga prokurorja Ornela Rrumbullaku. Mësohet se ata i kanë qëndruar deklarimeve të dhënave më herët, duke mos dhënë dëshmi të reja. Të arrestuari akuzohen për veprat penale "Pastrimi i produkteve të veprës penale ose veprimtarisë kriminale e kryer në bashkëpunim", "Prodhimi dhe mbajtja pa leje e armëve luftarake dhe e municionit" dhe "Falsifikimi i monedhave". Ndërkohë ditën e sotme 4 të pandehurit pritet të dalin përpara gjykatës së Durrësit për t'u njohur me masën e sigurisë.
HETIMET
Policia shqiptare ka shpallur në kërkim ndërkombëtar dy kushërinjtë, Alfred dhe Elvis Vladi, të cilët dyshohen se janë personat që kishin organizuar trafikun e 3.4 milionë eurove nga Belgjika për në vendin tonë. Ndërkohë hetimet e policisë dhe prokurorisë pritet të shtrihen jashtë vendit. Burime nga grupi hetimor bëjnë të ditur se iu është kërkuar bashkëpunim edhe homologëve të tyre belgë, gjermanë dhe atyre italian për të rënë në gjurmë të dy kushërinjve Vladi si dhe për të marrë informacion lidhur me vendin ku janë ngarkuar makinat në Belgjikë, që më pas udhëtuan drejt Gjermanisë, Italisë dhe më pas mbërritën në Shqipëri. Policia Shqiptare ka dyshime se veç kushërinjve Vladi, mund të ketë edhe persona të tjerë të përfshirë në histori.
Një ndër personat e arrestuar, shtetasi Alban Mollaymeri mësohet se kishte kontraktuar për transportin e makinave kompaninë e Edi Likës, e cila gëzonte të drejtën e transportit ndërkombëtar të mjeteve për të tretë me qira. Nuk dihet ende nëse Mollaymeri u porosit nga dy personat e shpallur në kërkim, por 40- vjeçari Mollaymeri deklaroi gjatë hetimeve se atij i ishte kërkuar ky shërbim nga Alfred Vladi, duke mohuar të kishte dijeni për 3.4 milionë euro që u gjetën në makinë. Kujtojmë se pasuria e Alfred dhe Elvis Vladit, të shpallur në kërkim si porositësit e 2 ' Toyotave' ku u gjetën paratë do të jetë subjekt i ligjit Antimafia. Mësohet se do të vihen nën sekuestro pasuritë e tyre, llogari bankare dhe pasuri të tjera të paluajtshme. Të dy kushërinjtë nga Dibra janë arratisur dhe dyshohet se kanë dalë jashtë
vendit. Nga verifikimet e bëra në qendrën kombëtare të biznesit, dy kushërinjtë Vladi rezultojnë pronarë biznesesh. Referuar këtyre të dhënave Elvis Vladi ka themeluar një kompani në shtator 2015, që ofron pjesë këmbimi për automjetet. Kushëri i tij Alfred Vladi rezulton të ketë themeluar në gusht të 2017, një kompani me objekt kryesor dhënie me qira të automjeteve dhe Shërbime të këmbimit valutor, nën emrin e subjektit
tregtar (" Tirana Rental Car"). Oficerët janë duke verifikuar edhe pasuritë e familjarëve të afërt të tyre për të parë nëse ata i justifikojnë ato.
Në sitën e hetuesve do të kalojë dhe pasuria e 4 të arrestuarve të tjerë Agim Çeka, Edi Lika, Klevi Lika dhe Alban Mollaymeri. Ky i fundit ka në pronësi një servis pranë zonës së bregut të lumit në kryeqytet.
OPERACIONI
Policia e Shtetit është vënë në dijeni nga burimet e saj vendase, në datën 20 qershor 2018, ditën e mërkurë, për një karroatrec me targa ' AA 120 SP', që pritej të transportonte disa autovetura, e mes tyre një mjet me sasi eurosh të padeklaruara, pa specifikuar tipin e automjeteve dhe as origjinën e vendit. Me marrjen e këtij informacioni, iu është dhënë porosi gjithë strukturave të pikat e kalimit kufitar për konstatimin dhe kontrollin e kësaj ngarkese.
Ditën e enjte, 21 qershor 2018, në mesditë, gjatë punimeve të parlamentit në sallën e Kuvendit, është bërë publik fakti lidhur me një automjet tip "Toyota Yaris" me 1.5 milion euro, të zbuluar në Gjermani. Po atë ditë, të enjten e kaluar, datë 21 qershor 2018, një agjenci ligj zbatuese shqiptare në orën 17: 00, ka njoftuar Policinë e Shtetit lidhur me një informacion për një ngarkesë me trajler që do të sillte disa mjete tip ' Toyota', e cila pritej të vinte nga Gjermania, e mes tyre një mjet me sasi eurosh të padeklaruara. Në datë 24 qershor 2018, në Portin e Durrësit në orën 07: 30, mbërriti nga Belgjika një trajler tip "Bizark" me 9 automjete, përmes Portit të Barit, Itali. Policia Kufitare, mbi bazën e porosisë së marrë në datë 20 qershor, ka bërë identifikimin dhe ndalimin e mjetit. Policia e Shtetit ka njoftuar Prokurorinë e Rrethit Gjyqësor Durrës, e cila po drejton hetimet. Më tej, specialistët për Hetimin e Krimeve në Drejtorinë Rajonale për Kufirin dhe Migracionin Durrës në bashkëpunim me efektivët e Drejtorisë Vendore të Policisë Durrës, nën drejtimin e prokurorisë, finalizuan operacionin dhe kryen veprimet procedurale.
Policia ka arrestuar në flagrancë shtetasit: Agim Çeka, 61 vjeç, lindur në Luz i Madh, banues në Durrës; Edi Lika ( Cani), 41 vjeç, lindur në Dibër, banues në Tiranë; Klevi Lika, 21 vjeç, lindur në Bulqizë, banues në Tiranë; Alban Mollaymeri, 40 vjeç, lindur dhe banues në Tiranë. Gjithashtu, janë shpallur në kërkim dhe punohet për kapjen e shtetasve: Alfred Vladi 33 vjeç, lindur në Peshkopi e banues në Tiranë; Elvis Vladi 38 vjeç, lindur në Peshkopi e banues në Tiranë.
Gjatë kontrollit të ushtruar në Pikën e Kalimit Kufitar Durrës në automjetin tip ' Bizark' të drejtuar nga shtetasi Agim Çeku dhe pronar Klevi Lika ( Cani), në 2 automjete të ngarkuar në të, tip ' Toyota' janë gjetur një shumë e konsiderueshme eurosh dhe franga zvicerane, të padeklaruara. Gjithashtu, janë ushtruar kontrolle në banesat dhe ambiente të tjera të personave të dyshuar. Janë sekuestruar në cilësinë e provave materiale: 3,366,800 euro dhe 100 euro që dyshohet të jenë të falsifikuara; 80,000 franga zvicerane; 10 automjete, nga të cilat 7 automjete të tipit ' Toyota Yaris', 1 tip ' Alfa Romeo', 1 tip ' Opel' dhe 1 tip ' Bizark'; 1 armë kallashnikov me 2 krehëra fishekë, gjetur nga kontrolli i ushtruar në banesën e shtetasit A. Çeka; 1 radio policie; 7 telefona celularë. Nga hetimet paraprake, Policia e Shtetit ka të dhëna të besueshme se ngarkesa e sekuestruar ishte e porositur nga shtetasit Elvis Vladi dhe Alfred Vladi, tashmë të shpallur në kërkim. Hetimet po vijojnë për zbardhjen e plotë të rrethanave të ngjarjes dhe zbulimin e personave të tjerë të implikuar.