Sezoni turistik, patrullime të përbashkëta nga Policia e Shtetit dhe Policia e Kosovës
LEZHË - Marrja e masave për mbarëvajtjen e sezonit turistik që tashmë ka filluar ka bërë bashkë në Lezhë, krerët e Policive të Shqipërisë dhe Kosovës. Drejtori i Policisë së Shtetit, Ardi Veliu dhe drejtori i Policisë së Kosovës, Naim Rexha nënshkruan dje Memorandumin e Bashkëpunimit "Për organizimin e shërbimeve të përbashkëta të policimit rrugor mes Policisë së Kosovës dhe Policisë së Shtetit Shqiptar, në territorin e Republikës së Shqipërisë", gjatë sezonit turistik 2018. Ky memorandum ka qëllim vendosjen e bashkëpunimit konkret për parandalimin e shkeljeve administrative në fushën e trafikut rrugor, uljen e numrit të ngjarjeve rrugore dhe zbatimin me rigorozitet të legjislacionit rrugor për krijimin e një mjedisi më të sigurt për të gjithë qytetarët dhe përdoruesit e rrugës, që qarkullojnë në akset rrugore, që lidhin dy vendet. Në një prononcim të përbashkët për mediat, pas nënshkrimit të memo- randumit, kreu i Policisë së Shtetit, Ardi Veliu, tha: "Sot ( dje), së bashku me drejtorin e Përgjithshëm të Policisë së Kosovës nënshkruam memorandumin e bashkëpunimit për sezonin turistik ku si edhe në vitet e tjera, shërbimi policor i Kosovës do të jetë prezent së bashku me shërbimet e Policisë së Shtetit për sigurimin e akseve rrugore, njëkohësisht edhe disa zonave turistike, të cilat frekuentohen masivisht nga shtetasit kosovar. Gjej rastin që të falënderoj drejtorin e Përgjithshëm të Policisë së Kosovës, njëkohësisht dhe Policinë e Kosovës për kontributin që është duke dhënë në drejtim të sigurimit dhe mbarëvajtjes të sezonit turistik në vendin tonë".
Nga ana e tij, kreu i Policisë së Kosovës, Naim Rexha, shprehu angazhimin për të mundësuar mbarëvajtjen e këtij sezoni turistik. "Me këtë rast dëshiroj të potencoj që qëllimin e kahershëm, të njëjtë me angazhimet tona të përbashkëta, po e begatoj me modalitete të reja të ofrimit të shërbimeve të sigurisë në trafikun rrugor dhe jo vetëm në trafikun rrugor, si hallkë e re shtesë të zinxhirit të gjatë të bashkëpunimit tonë të përbashkët me një model shtesë jashtëzakonisht të rëndësishëm të zvogëlimit të fataliteteve gjatë qarkullimit në rrugët publike si pasojë e aksidenteve të trafikut dhe ofrimit sa më të mirë të shërbimeve të trafikut të dy policive respektive, brenda afateve kohore me fokus të veçantë në mbulimin e tërë sezonit veror", tha ndër të tjera, Naim Rexha.