Tailandë, nis operacioni i ' Navy Seals' për shpëtimin e 12 djemve nga shpella Tham Luang

Nisin shirat, dalja zgjat disa ditë, 11 orë për çdo person

Ditën

e djeshme nisi operacioni i shpëtimit në Tailandë i ' Navy Seals' për të nxjerrë jashtë shpellës 12 djemtë e bllokuar prej dy javësh së bashku me trajnerin e tyre. "Sot është D- day dhe djemtë janë gati për të përballuar çdo sfidë", ka thënë për gazetarët shefi i operacionit Narongsak Osotanokor. Në zonë kanë filluar shirat dhe kjo ka shtyrë skuadrat e shpëtimit, që do ndihmojnë në nxjerrjen jashtë të futbollistëve, të përshpejtojnë operacionin. Djali i parë që do të nisë udhëtimin drejt lirisë është një 14- vjeçar, i pari nga djemtë e zgjedhur nga forcat e ushtrisë dhe të forcave të shpëtimit. Është nga ata më të fuqishmit dhe prandaj është zgjedhur pikërisht i pari për këtë dalje të mundimshme. Në zonë kanë filluar shirat Në zonën rreth shpellës Tham Luang ka filluar shiu, edhe pse jo me vrullin dhe intensitetin e madh që e karakterizon këtë zonë, duke rrezikuar që shpella të mbulohet sërish me ujë. Duke njoftuar për lirimin të shpejtë të tyre, përgjegjësit e operacionit thanë që është e nevojshme ta bëjnë tani për shkak të përkeqësimit të situatës nga shirat që priten të vijnë. Dalja nga shpella do të bëhet në më të shumtën e rrugës në këmbë. "Pjesa më e madhe e rrugës për të dalë nga shpella do të bëhet në këmbë dhe niveli i ujit tani është më i ulëti i ditëve të fundit", sqaron guvernatori Narongsak Osatanakorn, përgjegjës i operacionit, i cili nuk ka specifikuar se për sa metra fëmijët do të zhyten në ujë. Operacioni i shpëtimit do të zgjasë disa ditë dhe kjo varet edhe nga moti, thonë përgjegjësit e oper- acionit. Djali i parë që do të dalë nga shpella pritet të jetë në ' liri' jo më parë se ora 16 me orën tonë e ditës së sotme. Do të jenë rreth 18 zhytës profesionistë në ndihmë të djemve. Çdo fëmijë do të ketë dy zhytës në dispozicion, të cilët do të jenë të lidhur mbas një kavoje. Mes zhytësve 13 janë të huaj dhe 5 tajlandezë. Nxjerrja jashtë e djemve ka nisur në orën 10 të së dielës ( ora lokale) ora 5 e mëngjesit me orën tonë. Operacioni do të zgjasë 11 orë për çdo fëmijë. Për operacionin janë vënë në dijeni të gjithë familjarët e djemve dhe shpëtimi do të jetë tek e tek. Gazetarët janë spostuar rreth 2 km nga hyrja e shpellës rreth orës 4 të mëngjesit me orën tonë.