Negociatat, Hahn: Kalimi në qershor 2019, varet nga procesi i skanimit
Komisioneri për Zgjerimin pritet të vijë në Tiranë javën tjetër "Pakti detar, vlerësoj përpjekjet e Shqipërisë dhe Greqisë"
Komisioneri për Zgjer imin Johannes Hahn pritet të vijë javën e ardhshme në Tiranë. Vetë Komisioneri për Zgjerimin në Bashkimin Europian njoftoi vizitën e tij, gjatë fjalës që mbajti në Samitin për Ballkanin Perëndimor që zhvillohet në Londër. Kjo vizitë, e cila do të nisë nga Shkupi vjen në kuadër të një turi ballkanik që ka si qëllim sqarimin e hapave të mëtejshëm të integrimit pas rekomandimit të dhënë nga KE për Shqipërinë dhe Maqedoninë. Më herët në një postim në Twitter, duke iu referuar negociatave mes Tiranës dhe Athinës për çështjen e detit, Hahn shprehej se "janë për t'u vlerësuar përpjekjet mes dy vendeve për të firmosur këtë pakt dhe për të arritur në një marrëveshje". Ndërkohë, duke folur në një takim në kuadër të samitit të Londrës, Hahn u shpreh optimist se shumë shpejt Tirana dhe Athina do t'i japin zgjidhje mosmarrëveshjeve për çështje të lëna pezull. Ai shpjegon edhe arsyet pse procesi i zgjerimit me vendet e Ballkanit Perëndimor po zgjat më shumë nga sa ishte parashikuar. "Kemi nevojë për politikanë të zotë në rajon. Kemi parë të tillë, për shembull kur vjen fjala për bisedimet për çështjen e emrit me Maqedoninë, ose me shumë gjasa nëse do të ketë një marrëveshje mes Shqipërisë dhe Greqisë për ripërcaktimin e kufijve dhe kjo është vendimtare për qytetarët", u shpreh Hahn. "Disa prej shteteve të unionit janë të ashpër në veçanti pas eksperiencave që kemi pasur me anëtarësimet e reja, sepse ata kërkojnë të shohin jo thjesht përparim, por që ky përparim të jetë i pakthyeshëm. Kjo është edhe arsyeja pse negociatat e sotme dhe procesi i zgjerimit do të zgjasë më gjatë", sqaroi Hahn, në lidhje me vendimin që u mor më 28 qershor për Shqipërinë e Maqedoninë. Konferenca e Londrës është pjesë e procesit të Berlinit të nisur 4 vjet më parë. Liderët e gjashtë vendeve të Ballkanit Perëndimor, partnerë të Bashkimit Evropian dhe përfaqësuesit e institucioneve evropiane, u priten sot nga kryeministrja britanike, Theresa May, e cila prezantoi një pako masash për ndihmë për Ballkanin Perëndimor. Hahn ka anonçuar nga samiti i Londrës, se javën e ardhshme do të bëjë hapjen zyrtare të procesit të "skanimit" në Tiranë dhe Shkup. Procesi i skanimit ka të bëjë nga njëra anë me ekzaminimin analitik të legjislacionit të vendeve kandidate për të evidentuar nivelin e tyre të harmonizimit me legjislacionin e Bashkimit Europian. Nga ana tjetër, procesi i skanimit merret me identifikimin e fushave, ku kërkohet përpa- rim në legjislacionin e vendeve kandidate për të qenë në përputhje me rregullat e BE. "Detyra jonë tani është të përgatisim hapjen e negociatave vitin e ardhshëm përmes procesit të skanimit, apo një ekzaminim gjithëpërfshirës. Unë do të shkoj në Tiranë dhe në Shkup për të filluar procesin e skanimit me Shqipërinë dhe Maqedoninë javën e ardhshme. Eshtë një proces sfidues që tregon nivelin e angazhimit të këtyre vendeve për të avancuar, duke qenë se kalimi në fazën tjetër të qershorit të 2019- s varet pikërisht nga shpejtësia dhe cilësia e këtij procesi. Sa më shumë të bëhet gjatë procesit të skanimit, aq më shumë avancim do ketë për hapjen e negociatave", sqaroi Hahn. Komisioneri Hahn ka treguar në samitin e Londrës, se përfundimisht vendimi për të përcaktuar vitin 2025 si një afat indikativ për anëtarësimin e vendeve të Ballkanit në BE, edhe pse është ambicioz, ka pasur efekt pozitiv.