Pakti detar me Greqinë, Rama: Nuk ka tradhtarë. Hahn: Mbyllet për dy javë
Kryeministri pritet nga krerët e BE: Të angazhuar të zgjidhim problemet me fqinjët Presidenti i KE: Shqipëria, anëtare e BE- së, s'ka dyshim
Presidenti i Këshillit Evropian, Donald Tusk deklaroi dje se nuk ka asnjë dyshim se Shqipëria do të bëhet anëtare e BE- së. "Nuk kam dyshime që nëse Shqipëria do të vazhdojë me këtë temp reformash, do të jetë në gjendje që të përmbushë të gjitha rezultatet e kërkuara deri në qershorin e ardhshëm, sepse vendi i Shqipërisë është në BE dhe Shqipëria do të bëhet një anëtare e BE- së. Rreth kësaj nuk ka dyshime!", deklaroi dje presidenti Tusk gjatë një konference të përbashkët në Bruksel me kryeministrin shqiptar, Edi Rama. "Është shpresa dhe dëshira ime që të gjitha forcat pro perëndimore në Shqipëri të punojnë drejt të njëjtit qëllim. Përpjekjet tuaja për të sheshuar divergjencat me Greqinë janë prova më e mirë për angazhimin e Shqipërisë ndaj BE- së dhe ndaj marrëdhënieve të mira fqinjësore", theksoi me tej Tusk. Ai zbardhi edhe bisedën me Ramën, duke thënë se ranë dakord për nevojën për të rritur përpjekjet në lidhje me çrrënjosjen e migracionit të jashtëligjshëm në Shqipëri. Nga ana e tij, kryeministri Rama tha se, "gjatë këtyre 12 muajve do të punojmë fort për të arritur rezultate të mira, me qëllim që kur të futemi formalisht në negociata, të kemi fituar kohë dhe të ecim më shpejt". Ai premtoi se qeveria shqiptare është shumë e angazhuar "ndaj zgjidhjes së problemeve të vjetra me fqinjët e jugut". Duke ju referuar asaj çfarë tha Tusk, Rama shtoi se kanë bërë progres të mirë. "Shpresoj ta përfundojmë me sukses këtë dialog të vështirë, të hapur, por të sinqertë, siç jemi të angazhuar njëkohësisht ndaj bashkëpunimit dhe stabilitetit rajonal, ku rajoni ka bërë një progres të madh, por sigurisht ka ende shumë për të bërë", tha Rama.
TAKIMI ME HAHN
Ndërkohë po dje, kryeministri Rama ishte në një konferencë të përbashkët edhe me Komisionerin për Zgjerimin, Johannes Hahn. Komisioneri Hahn vlerësoi: "Përfundimet e qershorit të Këshillit të Çështjeve të Përgjithshme, i miratuar nga Këshilli Europian, përbënnë një hap të madh përpara në procesin e integrimit të Shqipërisë. Tashmë kemi një rrugë të qartë që të drejton në hapjen e negociatave të integrimit midis BEsë dhe Shqipërisë në qershor të vitit 2019. Ndërkohë, procesi i reformave duhet të vijojë me një ritëm të shpejtë, ashtu siç ka ndodhur deri më tani". Ai tha se do të jetë në Tiranë të enjten që vjen për të nisur punën përgatitore për këtë. "Kjo është një ambicie sfiduese, një punë gjithëpërfshirëse, në të cilën duhet të shohim në të gjitha drejtimet që përfshihen në 35 kapitujt. Kështu procesi ' screening' është i detyrueshëm, duhet bërë dhe nga cilësia e punës, varet ritmi me të cilin do të ecin negociatat më tutje. Mendoj se gjithçka që do të bëhet në muajt në vazhdim është e rëndësishme për cilësinë dhe shpejtësinë e diskutimeve në vijim", tha Hahn. Ai u shpreh më tej se "Ne jemi absolutisht gati për procesin analitik dhe presim me padurim të fillojmë në të gjitha drejtimet, duke mbajtur parasysh se do të jetë një punë e vështirë dhe nevojitet të bëhen përpjekje të mëdha për të gjitha hapat", u shpreh Rama, sa i takon nisjes së punës përgatitore për negociatat.
mbështet përkushtimin e kryeministrit Rama dhe qeverisë së tij, për të vazhduar përmbushjen e të gjithë objektivave thelbësorë. "Pres me padurim të flas për detaje të tjera javën e ardhshme në Tiranë, duke u takuar siç thashë, përsëri me kryeministrin, qeverinë, figura të rëndësishme të administratës, por gjithashtu, nëse do të ketë kohë, do të përpiqemi të flasim edhe me opozitën. Sepse edhe një herë, flasim për një objektiv kombëtar që ka nevojë për mbështetjen e të gjithëve në shoqëri, në mënyrë që të përmbushen synimet që ndahen nga të gjithë shqiptarët. Bëhet fjalë për një qëllim të fortë, të qartë, ku të gjitha sferat e shoqërisë bëhen bashkë", theksoi Hahn.
PAKTI ME GREQINË
Gjatë konferencës me Hahn, kryeministri Edi Rama deklaroi se Shqipëria është pranë marrëveshjes me Greqinë. Ai atakoi opozitën në të dyja anët e kufirit kur deklaroi se ka tradhtar, por në momentin e finalizimit të marrëveshjes, ata që kanë lëshuar akuza për negociatat që po zhvillohen do të turpërohen. "Situata sikur e shohim ne të gjithë, është se ka tradhtar në qeverinë greke dhe atë shqiptare. E vërteta është që të dyja palët po gjejnë zgjidhje në interesat më të mira të popujve të tyre. Gjendja e procesit është e tillë, kemi bërë mjaft progres. Ka çështje që mbulojnë 70 vite histori, nga ligji i luftës te kufiri detar, janë të vështira dhe ne po i përballojmë me frymën e hapjes, kemi bërë progres. Hije të së kaluarës kanë dalë sfond. Jam 100% i sigurt se kur të finalizohen rezultatet, kushdo që akuzon për tradhti nga të dy krahët do të turpërohet nga opinioni publik", tha Rama. Edhe komisioneri Hahn u shpreh se zgjidhja e probleme kufitare përshpejton negociatat e integrimit të Shqipërisë në BE, pasi në union nuk do të pranohet asnjë shtet që ka dosje të pazgjidhura. "BE nuk do të pranojë asnjë shtet që ka konflikte të pazgjidhura me vendet fqinje, kjo ka përshpejtuar negociata në disa vende, si në rastin e zgjidhjes së çështjes së emrit mes Greqisë dhe Maqedonisë apo raste të tjera. Shqipëria është në negociata me Greqinë, nuk preferoj të bëj ndonjë koment tjetër, më vjen keq që ka pasur keqkuptime. Pas dy javësh jam i bindur që do të ketë rezultate", tha Hahn.