Balla pret deputetin gjerman: Opozita të hartojë amendamentin, ne e votojmë
Shkolla e Magjistraturës, kreu i Grupit të PS: Morëm garanci nga Merkel Nicholas Lobel: Reformat duan kohë, por institucionet të funksionojnë
Kryetari i Grupit Par lamentar të PS- së Taulant Balla propozoi dje, një mënyrë konsensusi për opozitën sa i përket ligjit për shkollën e Magjistraturës. Në një konferencë të përbashkët me deputetin gjerman Nicholas Lobel, Balla u shpreh: "Ne rishprehim gatishmërinë tonë se, që në seancën e parë të 3 shtatorit, pasi dielli dhe vera të ketë qetësuar sadopak shpirtërat dhe mendjet e trazuara të opozitës, vendimi i parë, të cilin duhet të votojmë së bashku, bashkë me PD dhe LSI është pikërisht mundësimi i pranimeve të reja në Shkollën e Magjistraturës për të mos vonuar një vit djem dhe vajza ekselentë që kanë studiuar Drejtësi e që përmbushin kriteret, por që sigurisht do të kalojnë në konkursin profesional, me qëllim që 50 ndër ta të vijojnë studimet në Magjistraturë". "Besoj që kjo rishprehje nga ana jonë e kësaj gatishmërie përmban në vetvete edhe propozimin tonë të bërë për përfaqësuesit e opozitës, le ta shkruajnë ata amendamentin dhe ne do ta votojmë. Është një moment i rëndësishëm në rrugën tonë drejt Bashkimit Europian",deklaroi Balla, i pyetur nga gazetarët. Balla tha se gjatë takimit me deputetin gjerman e ka informuar për zhvillimet e fundit politike në vend dhe e ka falënderuar për mbështetjen e Gjermanisë në procesin e integrimit evropian, por edhe në procesin e vështirë të reformave që po ndërmerr mazhoranca. "Në fakt, diskutuam edhe për bojkotin e opozitës në seancat e fundit duke bllokuar edhe vijimin e punës së Shkollës së Magjistraturës. Lidhur me reformën zgjedhore e garantova përfaqësuesin e Bundestagut gjerman, sepse për transparencë të publikut është Bundestagu gjerman që ka një vëmendje të veçantë, për miratimin dhe implementimin e menjëhershëm të rekomandimeve të OSBE/ ODIHR",- tha Balla.
DEPUTETI I BUNDESTAGUT
Nga ana e tij, deputeti gjerman Nicholas Lobel tha në fjalën e tij: "Nga perspektiva gjermane, ky vit është vit shumë i rëndësishëm për sa i
përket marrjes së vendimit lidhur me fillimin e procesit të negociatave për anëtarësimin në Bashkimin Europian. Europa është një bindje dhe për të krijuar këtë bindje nuk duhet bindur vetëm Gjermania, por të gjitha shtetet anëtare për dhënien e perspektivës Europiane për Shqipërinë". "Për këtë është caktuar një plan kohor, i cili konstaton atë që në pranverën e vitit 2019 do të jetë Komisioni Europian, i cili do të paraqesë një raport progresi lidhur me Shqipërinë dhe
në varësi të këtij progresraporti do të merret edhe vendimi në muajt e mëtejshëm të pranverës 2019",- sqaroi Lobel. "Viti 2019 është një vit shumë i rëndësishëm për Shqipërinë, vit për të cilin po punojmë së bashku për inicimin e bisedimeve për në Bashkimin Europian. Por është një vit, i cili është i mbushur plot me sfida dhe për përballimin e këtyre sfidave jemi duke punuar së bashku me Shqipërinë, me qeverinë shqiptare, me kryeministrin Edi Rama, në mënyrë që zhvillimet e mira dhe pozitive të konstatohen në zhvillimin ekonomik, në stabilitetin politik, në reformën në drejtësi, në luftën ndaj korrupsionit dhe krimit të organizuar, por edhe në reformën zgjedhore së cilës Gjermania i kushton një rëndësi shumë të madhe. Po ashtu edhe përfshirjen në reformën në drejtësi të ashtuquajturave kërkesa të Kopenhagënit dhe mendoj që deri tani Shqipëria është në një rrugë të mirë. Në një rrugë të mirë për ecuritë dhe vijimin drejt perspektivës europiane",- theksoi Lobel. Ai deklaroi se duhen çuar përpara reformat. "Ne përfaqësohemi në këtë fushë me 50 ekspertë ndërkombëtarë, të cilët kanë të drejtë që të jenë këtu që të këqyrin këtë proces reformash, por edhe të influencojnë në të lidhur me skanimin e gjyqtarëve, gjyqtareve, prokurorëve, prokuroreve. Reforma në drejtësi dhe procesi i vetingut është një gur i rëndësishëm themeli në mënyrë që rezultatet e arritura dhe performanca e Shqipërisë të jenë të qëndrueshme",- tha deputeti gjerman. I pyetur në lidhje me vakancat në Gjykatën Kushtetuese e të Lartë, Lobel tha se "ndonjëherë reformat në shtetin e së drejtës janë reforma që marrin kohën e tyre dhe zgjasin shumë. Reforma në drejtësi dhe institucionet e drejtësisë janë shtylla e një shteti funksionues demokratik dhe për të arritur që të jenë shtyllë e një shteti demokratik, mbase ndonjëherë reformat që ndërmerren janë të gjata dhe të thella. Por një shtet demokratik që të funksionojë duhet të ketë edhe institucione dhe instrumente në mënyrë që të funksionojë". Ndërsa kreu i Grupit të PS- së, Taulant Balla, i pyetur në lidhje me vendimet e Komisionit të Pavarur të Kualifikimit deklaroi: "Mua më vjen keq që Partia Demokratike merr përsipër të kompromentojë vendimet e KPK apo në të ardhmen, ndoshta edhe ato të apelimit, por Partia Socialiste nuk do të bëhet asnjëherë pjesë e çdo lloj komenti ndaj një institucioni tërësisht të pavarur, ku të drejtën e monitorimit ne shqiptarët, ne ligjvënësit e Kuvendit të Shqipërisë të gjithë në unanimitet të plotë, 140 nga 140, ja kemi dhënë Operacionit Ndërkombëtar të Monitorimit, të cilët gjej rastin t'i falënderoj".