Vetingu, në "sitë" gjykatësi Bledar Abdullai, KPK: Bashkëjetuesja, s'justifikon pasurinë
Më datë 30 korrik jepet vendimi për kandidatin për KLGJ
Komisioni
i Pavarur i Kualifikimit ka zhvilluar ditën e djeshme seancën dëgjimore me gjyqtarin e Gjykatës së Tiranës, njëkohësisht kandidat për Këshillin e Lartë Gjyqësor, Bledar Abdullai. Ai u njoh me rezultatet e hetimit administrativ të Komisionit. Në seancën dëgjimore trupa gjykuese është shprehur se gjyqtari Abdullai nuk ka deklaruar investimet në një fond privat pensionesh nga prindërit e tij. Subjekti rezulton të ketë qenë i saktë në deklarimin e pasurive të tjera, siç janë pjesët takuese në një apartament, sipërfaqe toke dhe ullishteje në Kutalli të Beratit. Pikëpyetjet për gjykatësit nisin pas vitit 2016, kur pjesë e deklarimit është bërë bashkëjetuesja me profesion notere, për të cilën Komisioni tha se ka mungesë burimesh financiare për të justifikuar pasurinë. Po ashtu thuhet se bashkëjetuesja e gjyqtarit ka pasaktësi në formularin e pasurisë. Ajo zotëron dy apartamente, një në Tiranë dhe një në Golem, garazh, automjet tip "Toyota", si dhe 100 mijë lekë aksione në një shoqëri në likuidim e sipër. Nga hetimi administrativ ka rezultuar se partnerja e gjyqtarit e ka përfituar apartamentin dhe garazhin përmes një kontrate shkëmbimi me të motrën. Është konstatuar, gjithashtu, se ajo kishte lidhur fillimisht një kontratë porosie për blerjen e një apartamenti, një zyre dhe një garazhi në vlerën e 192 mijë eurove. Fillimisht ajo kishte paguar 101 mijë euro, por më pas kontrata e sipërmarrjes është revokuar, për shkak se kompanie nuk ka përmbushur detyrimet e saj. Për transaksionin e mësipërm komisioni ka përllogaritur se bashkëjetuesja ka pasur mungesë burimesh financiare.
SEANCA
Në seancën dëgjimore trupa gjykuese është shprehur se gjyqtari Abdullai nuk ka deklaruar investimet në një fond privat pensionesh nga prindërit e tij. Subjekti rezulton të ketë qenë i saktë në deklarimin e pasurive të tjera, siç janë pjesët takuese në një apartament, sipërfaqe toke dhe ullishteje në Kutalli të Beratit. Gjykatësi Abdullai i asistuar edhe nga avokati Artan Hajdari deklaruan përpara trupës gjykuese se bashkëjetuesja ka pasur të ardhura të mjaftueshme për të justifikuar pasurinë e saj. Në përfundim, gjykatësi i karrierës kërkoi konfirmimin në detyrë. Vendimi për të pritet të shpallet me datë 30 korrik.