KPK e konfirmoi në detyrë, ONM ankimon vendimin për gjyqtarin Bashkim Dedja

Kreu i Gjykatës Kushtetuese Bashkim Dedja, i cili u konfirmua në detyrë nga Komisioni i Pavarur i Kualifikimit dhe kaloi vetingun tani do të kalojë në një tjetër hallkë. Atij do t'i duhet që të përballet dhe me Komisionin e Posaçëm të Apelimit ( KPA). Operacioni Ndërkombëtar i Monitorimit ka paraqitur ditën e djeshme një shkresë ku kërkon që kreu i Gjykatës Kushtetuese duhet të kryer sërish rivlerësimin e tij. Sipas Komisionerit Publik, provat nuk arrinin në nivel të besueshëm.

Më herët gjatë seancës dëgjimore të zhvilluar më datë 8 qershor u konstatua se Bashkim Dedja nuk justifikonte një shumë prej 15 mijë eurosh, të cilën e kishte marrë hua nga vëllai i tij. Sipas KPK- së, Dedja kishte paqartësi dhe para të pajustifikuara në deklaratat e pasurive. Ato kanë të bëjnë me huatë për blerjen e një apartamenti në Tiranë, me sipërfaqe 146 metra katrorë. Relatorja e komisionit, Xhensila Pine tha se është kryer hetim për deklarimet e pasurisë së Bashkim Dedes: "Apartament banimi 146 m katror, garazh me vlerë 118 mijë euro. Burimi i këtyre aseteve janë kredi bankare 120 mijë euro me afat 20 vjet. Hua pa interes 25 mijë euro. Të ardhurat e tij, 35 mijë euro bashkë me bashkëshorten. Vlera e apartamentit ë shtë 180 mijë euro". Bashkim Dedja ka bërë dy deklarata noteriale të dyshimta: 15 mijë euro hua nga vëllai, 25 mijë euro për të cilat deklaroi se ia kishte marrë kunatit, e më pas babait të kunatit. Probleme janë vërejtur edhe me pronësinë e një apartamenti 98 metra katrorë në Tiranë, i cili është deklaruar në vitin 2003 në bashkëpronësi mes Dedjes dhe njërit prej vëllezërve të tij, në masën 50 me 50. Më pas, Dedja, në deklaratën për llogari të vetingut, ka deklaruar se apartamenti është i tiji 100 %. Në lidhje me këtë, avokati sqaroi se vëllai i gjyqtarit, Mensur Dedja nuk ka marrë kurrë në jetën e tij kredi, por apartamentin e tij e ka vënë si kolateral në emër të nipit të tij.