Prokuroria: Ja si është abuzuar ndër vite me fondet e klubit të futbollit "Vllaznia"
Transfertat për llogari të futbollistëve e stafit s'përputhen me listëpagesat e shoqërisë "Blerjet dhe kontratat e ndryshme janë kryer pa procedurë prokurimi, s'dihet ku kanë shkuar paratë"
Një ditë pasi ish- ad ministratori i klubit të futbollit "Vllaznia" sh. a., Neritan Kalamishi i konsideroi sulm politik dhe qesharake akuzat e ngritura ndaj tij për shpërdorim të fondeve publike dhe shkelje të barazisë së pjesëmarrësve në tendera, janë zbardhur detaje të reja në lidhje me skandalin e fondeve të këtij klubi. Pas përfundimit të hetimeve për dy ish- administratorët e Vllaznisë, Fatos Gjyrezi dhe Neritan Kalamishi si dhe ish- financieri Denis Fani, hetuesit e çështjes rendisin argumente të reja për abuzimet e bëra nga këta persona. Këta tre shtetas janë dërguar si të pandehur në Gjykatën e Shkallës së Parë në Shkodër, ndërsa akuzohen se i kanë shkaktuar shtetit një dëm prej 300 milionë lekësh të vjetër në total. PROKURORIA Mësohet se në dosjen e prokurorisë së qytetit verior për tre ish- zyrtarët e kuqebluve thuhet se blerjet dhe kontratat e ndryshme janë kryer pa procedurë prokurimi. Nga detajet e reja që përmban dosja ( sipas prokurorisë), dy ish- administratorët dhe ish- financieri nuk kanë bërë asnjë studim të tregut në lidhje me vlerën e shërbimeve apo çmimin e mallrave të ofruara nga operatorë të ndryshëm në treg, por janë kontraktuar ata operatorë ekonomike që kanë qenë të njohur prej administratorëve të klubit apo personave të tjerë të njohur prej tyre. Nuk ka asnjë dokument apo akt formal dhe zyrtar, me anë të të cilit të provohet apo vërtetohet se si janë kontaktuar operatorët e ndryshëm ekonomikë, të cilët kanë ofruar shërbime apo kanë shitur mallra të ndryshëm për nevojat e klubit të futbollit "Vllaznia". Më tej, prokuroria pretendon se për shkak të mospasjes së një rregulloreje të miratuar në lidhje me pagat dhe nivelin e tyre për kategori të ndryshme të punësuarish si dhe moskryerjes së veprimeve nëpërmjet arkës, nuk ka një pasqyrë apo situatë të saktë se ku kanë shkuar dhe përse janë shpenzuar paratë e klubit. Organi i akuzës bën me dije se nga ana e administratorëve të klubit "Vllaznia" ndër vite janë kryer veprime dhe mosveprime në kundërshtim me ligjin "Për menaxhimin financiar dhe kontrollin", qëllimi i të cilit është shmangia e shpërdorimit, keqpërdorimit dhe vjedhjes së pasurisë. Gjithashtu, edhe nga financieri i klubit janë kryer veprime dhe mosveprime në kundër-
shtim "Për kontabilitetin dhe pasqyrat financiare". Ndërkaq, prokuroria në dosjen e saj bën të ditur se nga analiza e bankave të shoqërisë "Vllaznia" sh. a. rezulton se janë kryer transferta për llogari të futbollistëve/ lojtarëve dhe stafit tjetër të klubit, të cilat nuk përputhen me fondin e pagave të deklaruara në listëpagesat e shoqërisë. Sipas hetuesve të çështjes, kjo do të thotë se ndër vite për futbollistë të caktuar apo stafin tjetër të shoqërisë janë derdhur më pak ose më shumë paga sesa ato të pasqyruara në listëpagesat përkatëse të deklaruara për atë periudhë kohore. Madje, nga ana e klubit janë bërë derdhje/ kreditim pagash për futbollistë/ lojtarë apo stafin e tij administrativ, ndërkohë që në listëpagesat e asaj periudhë kohore këta persona nuk kanë qenë fare të deklaruar. Sipas prokurorisë, këto veprime të kryera nga financieri i shoqërisë janë kryer në kundërshtim me disa ligje në fuqi. Tashmë, dy ish- administratorët Fatos Gjyrezi, Neritan Kalamishi dhe ish- financieri, Denis Fani do të duhet të përballen me Gjykatën e Shkallës së Parë Shkodër pas akuzave të ngritura nga prokuroria.