Rama: Vetingu godet, opozita hidhet përpjetë. Basha: Koka e oktapodit

Reforma në drejtësi, kryeministri e kreu i PD- së replikojnë në distancë Kreu i qeverisë e cilësoi opozitën "humbëse pa pikë dinjiteti"

Vetingu dhe reforma në drejtësi përplasi dje kryeministrin Edi Rama dhe kreun e Partisë Demokratike, Lulzim Basha. Përmes një reagimi në rrjetin social "Facebook", Edi Rama tha: "Vetingu vijon të godasë me sukses në kokë oktapodin e korrupsionit degjenerues në drejtësi. Por, për fatkeqësinë e zgjedhësve të saj që e mbështesin vetingun, njësoj si të gjithë qytetarët, e për turpin e saj më të madh, opozita hidhet përpjetë pas çdo goditjeje". Kreu i qeverisë e mbylli reagimin e tij të shkurtër duke i cilësuar opozitarët "humbës pa pikë dinjiteti". Nuk vonoi dhe kreu i opozitës i ktheu përgjigjen e tij "online", duke e cilësuar kryeministrin "kreun e oktapodit të drejtësisë". "Edi Rama është koka e oktapodit të drejtësisë, që mbron dhe nuk ndëshkon politikanët e korruptuar e të lidhur me krimin. Për të mbrojtur Tahirin, Xhafajn, Roshin, Frrokun, Dakon, Sejdinin, Ahmetajn dhe Gjiknurin me shokë, Edi Rama kapi Prokurorin e Përgjithshëm dhe zhduku Gjykatën Kushtetuese dhe Gjykatën e Lartë", u shpreh kryetari i PD- së. "Tani Edi Rama po mbron nga vetingu gjyqtarët e korruptuar si Toska, Dvorani dhe Faqolli, si shpërblim për dosjet që mbyllën dhe si kapar për dosjet që duhen mbyllur. Sa herë PD denoncon me fakte konfirmimin në detyrë në kundërshtim me ligjin e vetingut të shërbëtorit të Edi Ramës në Gjykatën e Lartë, Ardian Dvorani, Edi Rama reagon me akuza të dala boje kundër opozitës", u shpreh kryetari i PD- së, Basha. Sipas tij, "vetingu i kontrolluar politikisht prej Ramës ka konfirmuar në detyrë gjyqtarë e prokurorë të korruptuar, pavarësisht rekomandimit të Operacionit Ndërkombëtar të Monitorimit për shkarkimin e tyre. Ndaj, atij i ka rënë maska dhe tregohet botërisht me gisht si njeriu që

mbron korrupsionin në drejtësi, për të mbrojtur interesat e veta dhe të krimit të organizuar me të cilin bashkëqeveris". Edhe pak ditë më parë, kryeministri u shpreh: "Fiks dy vjet më parë kaloi pas njëmijë qametesh reforma në drejtësi. Sot pastrimi i llumit të madh ka nisur pa ndalim. Ndërsa ata njësoj si atëherë i bien njëri gozhdës e tjetri patkoit dhe po njësoj SHBA- BE u kërkojnë t'i thërrasin mendjes. Sa gjynah për këdo i beson e dëgjon ende". Ndërsa opozita e ka akuzuar maxhorancën se e ka lënë vendin pa Gjykatë Kushtetuese e të Lartë. Ndërsa, kryetari i opozitës, Lulzim Basha propozoi 7 kushte për dialog me maxhorancën sa i përket ligjit për magjistraturën. Pas kërkesës për dialog të bërë nga LSI, në seancën e fundit të Kuvendit, Basha tha në një konferencë shtypi se nëse ka ndonjë shans për të shpëtuar reformën në drejtësi, ai është kthimi te konsensusi i 21- 22 korrikut. Në 7

propozimet e tij për zgjidhjen e situatës, Basha kërkoi që të zhbëhen të gjitha rregullat ligjore që janë miratuar me dyer të mbyllura të njëanshme nga ana e maxhorancës, në kundërshtim me frymën e konsensusit të arritur në ndryshimet kushtetuese, në kundërshtim me vetë parashikimet e Kushtetutës. Ai kërkoi zgjidhjen e situatës së paligjshmërisë në organin e prokurorisë, zgjidhjen e situatës së paligjshmërisë në procedurën e përzgjedhjes së anëtarëve të jashtëm të KLGJsë e KLP- së duke eliminuar nga gara të gjithë kandidatët që nuk plotësonin kriteret kushtetuese ligjore apo ishin përjashtuar nga OMN- ja dhe duke përsëritur procedurën e zgjidhjes. Kreu i PD- së kërkoi edhe zgjidhjen urgjente të ngërçit të krijuar në Gjykatën Kushtetuese, duke evidentuar mekanizmat e duhura kushtetues dhe ligjore që kjo gjykatë të jetë plotësisht funksionale.