Ruçi, Mesit: Nëse ligjet s'përputhen me BE, do t'ua kthejmë mbrapsht, të mos kemi fjalë
Diskutimet në Konferencën e Kryetarëve, kreu i Kuvendit i tërheq vëmendjen zv. kryeministres "Kthehuni në gardianë të ligjit, para se të depozitohet në parlament"
Kuvendi ka zbardhur procesverbalin e Konferencës së Kryetarëve të datës 4 korrik, mbledhje në të cilën u fol edhe për projektligjet e fundit të sesionit që u mbyll më datë 23 korrik. Por në diskutimin e zhvilluar ka qenë kryetarja e Komisionit të Sigurisë, Ermonela Felaj, e cila e ka pyetur zv. kryeministren Senida Mesi, nëse kishte urgjencë për të kaluar ligjin "Për kontrollin shtetëror të transferimeve ndërkombëtare të mallrave ushtarake dhe të artikujve e teknologjive me përdorim të dyfishtë" me urgjencë apo duhej kaluar për në shtator, pasi nga Komisioni i Integrimit i kanë thënë se mungon tabela e përputhjes me legjislacionin e BE- së. Zv. kryeministrja Mesi ka thënë se do të konsultohej me kryeministrin Rama, por nuk kishte dëgjuar për urgjencë. Këtu ka ndërhyrë kreu i Kuvendit, Gramoz Ruçi, i cili duket të ketë qenë i prerë. "Duhet të bëni një kujdes zonja zëvendëskryeministre, veçanërisht pas daljes së vendimit të fundit të Këshillit të Bashkimit Europian. Tradicionalisht, por veçanërisht këtë vit kalendarik, duhet të keni në qendër të vëmendjes tabelën e përputhshmërisë së legjislacionit. Këtë ta keni të prerë dhe të mos ketë absolutisht asnjë lëshim në këtë drejtim", ka thënë Ruçi.
DISKUTIMI NË KONFERENCËN E KRYETARËVE
Mimi Kodheli - Faleminderit zoti kryetar! Komisioni i Politikës së Jashtme është komision për dhënie mendimi lidhur me ratifikimin e dy marrëveshjeve, përkatësisht 1) Projektligji "Për ratifikimin e memorandumit të qëllimit, ndërmjet qeverisë së Republikës së Shqipërisë dhe qeverisë së Shteteve të Bashkuara të Amerikës, për instalimin dhe përdorimin e Sistemit për Krahasimin dhe Vlerësimin e Sigurt të Identifikimit Personal ( PISCES)" dhe 2. Projektligji "Për ratifikimin e protokollit, ndërmjet Republikës së Shqipërisë dhe Mbretërisë së Spanjës, për zbatimin e marrëveshjes, ndërmjet Republikës së Shqipërisë dhe Komunitetit Evropian, për ripranimin e personave me qëndrim të paautorizuar", të cilat i takojnë Ministrisë së Punëve të Brendshme. Bazuar në kalendar, këto dy marrëveshje duhet të përfshihen në rendin e ditës të seancës së ditës së hënë, datë 9 korrik, në një kohë që nuk kanë kaluar në komisionin tonë. Fola me kryetaren e Komisionit të Sigurisë Kombëtare, që është edhe komision
Përgjegjës, zonjën Felaj, e cila ka planifikuar të bëjë një mbledhje të komisionit respektiv, në një kohë që mua më rezulton e pamundur që edhe ne të zhvillojmë mbledhje ditën e premte, pasi nuk arrijmë të sigurojmë dot kuorumin dhe marrëveshjet nuk bëhen dot gati për seancën e së hënës.
Mimoza Pano - Sipas rregullores, neni 32, pika 3 e saj, komisionet mund të mblidhen edhe gjatë zhvillimit të seancës plenare me miratimin e drejtuesit të seancës, kryetarit të Kuvendit.
Mimi Kodheli - Dakord atëherë, po e lëmë për nesër në seancë për të zhvilluar mbledhje.
Ermonela Felaj - Do të doja të shtoja se, ne si Komision i Sigurisë jemi komision për dhënie mendimi dhe jo përgjegjës në lidhje me projektligjin "Kodi Ajror në Republikën e Shqipërisë". Kemi folur me shërbimet e Kuvendit në lidhje me Kodin Ajror, që ndoshta do të ishte më e përshtatshme që të mos e përfshinim tani në kalendar.
Do të doja të pyesja zëvendëskryeministren, zonjën Senida Mesi në lidhje me projektligjin "Për kontrollin shtetëror të transferimeve ndërkombëtare të mallrave ushtarake dhe të artikujve e teknologjive me përdorim të dyfishtë", nëse ka urgjencë shqyrtimi i këtij
projektligji, i cili është parashikuar në kalendar për t'u shqyrtuar në seancën e datës 19 korrik 2018. Nga Komisioni i Integrimit më thonë se mungon tabela e përputhjes dhe nga ana tjetër ligji është shumë i ngarkuar me terminologji teknike dhe ndoshta do të na marrë shumë kohë. Është e nevojshme që ta kalojmë tani, apo ta shtyjmë për në shtator?
Senida Mesi - Në Këshill të Ministrave nuk kam dëgjuar për ndonjë urgjencë, por do të konsultohem edhe me kryeministrin për këtë problematikë në lidhje me projektligjin dhe do t'ju kthej përgjigje, si juve zoti kryetar, edhe zotit Balla, kryetarit të Grupit Parlamentar të Partisë Socialiste.
Gramoz Ruçi - Duhet të bëni një kujdes zonja zëve n d ë s k r y e m i n i s t r e , veçanërisht pas daljes së vendimit të fundit të Këshillit të Bashkimit Europian. Tradicionalisht, por veçanërisht këtë vit kalendarik, duhet të keni në qendër të vëmendjes tabelën e përputhshmërisë së legjislacionit. Këtë ta keni të prerë dhe të mos ketë absolutisht asnjë lëshim në këtë drejtim. Edhe ju si zëvendëskryeministre për marrëdhëniet me parlamentin edhe me ministrin për Europën dhe Punët e Jashtme dhe përfaqësuesit e saj duhet të ktheheni në gardianë të kësaj çështjeje përpara se ligji të depozitohet në parlament. Është një gjë shumë e mirë që Komisionin e Integrimit, që ndjek këtë çështje e ka opozita, por pavarësisht, anëtarët tanë duhet të bëhen gardianë të kësaj çështjeje. Kjo është një nga funksionet tona si parlamentarë, prandaj të mos kemi fjalë. Në qoftë se do të mungojë tabela e përputhshmërisë, do të kthehen ligjet mbrapsht, ta dini këtë, pasi nuk mund të bëjmë sikur nuk e di, sikur nuk e shikon, sikur s'e dëgjon, sikur s'e kupton, as deputetët, as komisionet dhe as seanca e parlamentit. Këtë duhet ta keni të prerë si qeveri! Tjetër?