BEKIM LUMI HUMB BETEJËN ME SËMUNDJEN E RËNDË REGJISORI I NJOHUR
Është
ndarë nga jeta duket humbur betejën e vështirë me sëmundjen e rëndë në moshën 52- vjeçare regjisori Bekim Lumi. I lindur në Suharekë, gjatë viteve 1987– 1991 ai ka studiuar Gjuhë dhe Letërsi Shqipe në Fakultetin Filologjik të Universitetit të Prishtinës. Kurse gjatë viteve 1992– 1996 ka mbaruar studimet për Regji Teatri, në Akademinë e Arteve të Bukura në Tiranë, në klasën e profesor Agim Qirjaqit. Në të njëjtin universitet, me 2010 ka mbaruar edhe studimet e magjistraturës. Nga viti 2002 deri në vitin 2008 ka punuar si gazetar i fushës së kulturës në radion “Evropa e Lirë”. Përgjatë këtyre viteve, ai ka punuar si regjisor i pavarur, në Teatrin Kombëtar të Kosovës, në Teatrin “Dodona” si dhe ka realizuar projekte teatrore me kompaninë e tij teatrore “Loja”. Disa nga shfaqjet e tija kryesore janë: “Mësimi”, “Galani”, “Arushani & Fejesa”, “Shtëpia e Bernarda Albës”, “Çifti Martin”, “Këmisha e gjakut”, “Dillerat”, “John Cage’s Hamlet”, “Nana dhe fëmija” dhe e fundit “Arturo Ui”. Me shfaqjet e tija, ai ka qenë pjesëmarrës në dhjetëra festivale të rëndësishme kombëtare e ndërkombëtare, në Zvicër, Gjermani, Itali, Greqi, Rumani, Bosnjë e Hercegovinë e në vende të tjera. Bekim Lumi, me punën e tij si regjisor është shpërblyer me shumë çmime kombëtare e ndërkombëtare, ndër të cilat edhe: në vitin 2006, me shfaqjen “Mësimi”, në Festivalin Ndërkombëtar të Teatrit në Lugano të Zvicrës ka fituar çmimin kryesor për shfaqjen më të mirë. Në vitin 2016 ka fituar “Çmimin Vjetor për Shfaqjen më të mirë”, të cilën e ndanë Ministria e Kulturës e Kosovës. Lumi ka qenë botues dhe kryeredaktor i revistës së mirënjohur për teatër “Loja”, e cila është botuar në Kosovë nga viti 2006 deri në vitin 2010. Bekim Lumi është autor i dhjetëra shkrimeve, analizave, studimeve e eseve për teatrin dhe përgjithësisht për skenën kulturore në Kosovë dhe më gjerë. Nga viti 2002 ka punuar si profesor në Fakultetin e Arteve, dega e regjisë së Teatrit. Në një intervistë për gazetaren Jorida Pasku, 9 vite më parë, Lumi i pye- tur për propozimet regjisoriale këtu në Tiranë, thoshte se “trajtohen në mënyrë tradicionale, në mënyrë konvencionale, steriotipike, pa ide të reja regjisoriale. Gjithë problemi është se si mund të trajtosh në kontekst të shek. XXI, një kor antik. Çfarë kuptimi ka kori i tragjedive antike greke për sensibilitetin e njerëzve të shekullit tonë? Nuk është puna që ta marrim ashtu siç e ka thënë autori dhe ta nxjerrim në skenë. Për shembull korin e ‘ Persëve’ të Eskilit, unë do ta trajtoja si një ritual të gjëmës shqiptare. Nuk do të orientohesha në skematizmin me të cilin janë mbushur skenat teatrore të botës shqiptare”. Sipas tij, shqiptarët kanë një traditë të jashtëzakonshme etnologjike që do të ishte mirë të ishte prezente në shfaqjet shqiptare. Ai shtonte se nga tragjeditë antike ka pasur pak vënie si në Kosovë dhe në Shqipëri, e diku në vitin ‘ 92, regjisori Agim Qirjaqi ka vënë tragjedinë e Shekspirit “Rikardi III” dhe asokohe ka qenë një inskenim i mrekullueshëm. “E vlerësoj realizimin e Agim Qirjaqit për shkak të mënyrës bashkëkohore të trajtimit, të tejkalimit të disa konvencioneve tradicionale apo klisheve stereotipa, me të cilët asokohe dhe tani vazhdon të jetë i mbushur teatri shqiptar, në Kosovë dhe Shqipëri. Vlerësoj gjithashtu elegancën e jashtëzakonshme aristokratike, profesionale që Qirjaqi tregoi me ‘ Rikardin III” - shprehej Lumi.
Ministrja e Kulturës së Shqipërisë, Mirela Kumbaro i ka dërguar një mesazh ngushëllimi ministrit të Kulturës së Kosovës, Kujtim Gashi. Në mesazhin e saj, Ministria e Kulturës e Republikës së Shqipërisë shpreh ngushëllimet e thella për humbjen e parakohshme të profesorit dhe regjisorit të artit skenik, Bekim Lumi. “Ikja e tij është një humbje e madhe për teatrin shqiptar. Me kontributin e tij të vyer në skenën mbarëkombëtare, me idetë novatore dhe risitë që solli, Bekim Lumi mbetet regjisori që sfidoi me art ikjen tokësore dhe i qëndroi skenës deri në momentin e fundit. I bashkohemi dhimbjes së Kosovës, familjes, artistëve dhe gjithë dashamirësve! Ai është artisti i të gjithë shqiptarëve. I paharruar, kujtimi i tij!”, thotë Kumbaro.