Vjen i nxehti afrikan, priten temperatura deri 48° C
' Në flakë' pjesa jugperëndimore e Europës, ja shifrat alarmante që u regjistruan Vera e ' zjarrtë', pasojë e qartë e ngrohjes globale
Meteorologët parash ikojnë që pjesë të Europës të kapin shifra rekord, duke shënuar temperaturat më të larta të të gjitha kohërave. Ekspertët parashikojnë që në disa pjesë të Spanjës dhe Portugalisë temperaturat të variojnë nga 40 deri në 48 gradë celsius në ditët në vijim. Pjesë të jugperëndimit të Francës pritet gjithashtu që të preken nga vala e të nxehtit ekstrem, ashtu sikurse edhe në Britaninë e Madhe. Të dhënat bënë që autoritetet spanjolle të lëshojnë alarmin e parë për 2018- n. Ata i bënë thirrje banorëve që të qëndrojnë larg diellit dhe të pinë sa më shumë ujë. Pritet që 27 nga 50 provinca në vend të preken nga i nxehti ekstrem, duke nisur nga e enjtja. "Temperaturat nëpër Iberi mund të thyejnë rekordin e të gjitha kohërave në Kontinentin Europian, duke shkuar në 48 gradë Celcius", tha në një postim në "Twitter", Zyra Meteorologjike. Autoritetet portugeze kanë mobilizuar 11 mijë vullnetarë zjarrfikës, policë dhe ushtarë për të kontrolluar operacionet në një situatë të mundshme zjarri. Lajmi i mirë është që pas ditës së diel temperaturat pritet të ulen. Edhe autoritetet në Shqipëri kanë paralajmëruar një javë të nxehtë, me temperatura mbi 36° C thuajse në të gjithë ultësirën perëndimore. Në zona specifike, pritet që temperaturat të ngjiten në 39° C. Shqipëria do të mbetet në periferi të valës së të nxehtit afrikan, njofton "Meteoalb", valë që gjatë mesditave të kësaj fundjave, sjell temperatura mbi 30° C në 90% të territorit shqiptar. Në zonat malore temperaturat maksimale variojnë nga 31 në juglindje deri 35° C zonat verilindore si Kukësi; në bregdet dhe zonat e ulëta temperaturat maksimale ngjiten në 35 - 36° C por në zona specifike pritet që temperaturat maksimale të ngjiten lehtësisht mbi 38° C. Sipas "Meteoalb", në zona specifike, pritet që temperaturat të ngjiten në 39° C ( Shkodra, Berat dhe rrethinat e tyre). Përsa i përket shirave, parashikohet që 10ditëshi i parë të jetë kryesisht i thatë, shirat më të pranishëm në formën e stuhive të izoluara në zonat malore ndërsa në dt. 2 - 3 gusht rrebeshe afatshkurtra rrezikojnë zonat Qendrore dhe Jugore. Ndërkaq vera e temperaturave ekstreme vazhdon me valë të nxehti rekord, këtë muaj, në të katër kontinentet e hemisferës veriore jo tropikale. Të hënën e 23 korrikut, Japonia, regjistroi një temperaturë që asnjëherë më parë nuk ishte arritur në vendin ishull që kur regjistrimi i të dhënave filloi në vitet 1800. Kumagaja, një qytet në veri të Tokios, regjistroi 41.1 gradë celsius në mesin e një vale të nxehti disajavëshe që ka shkaktuar edhe shumë viktima. Temperatura ekstreme po prekin edhe vende të tjera në Azinë lindore; Koreja e jugut dhe ajo e Veriut kanë regjistruar temperatura rekord prej afër 40 gradësh celsius. Dhe pikërisht për këtë lloj vale të nxehti kanë paralajmëruar shkencëtarët, kur i binin kambanave të alarmit për ngrohjen e planetit përmes emetimeve të gazrave që shkaktojnë efektin serë. "Pasojat e ndryshimeve klimaterike, nuk janë më të padukshme", thonë shkencëtarët, ' ne po i shohim ato në kohë reale, në formën e valëve të paprecedentë të të nxehtit, përmbytjeve, thatësirave dhe zjarreve masive. Pjesa më e madhe e Evropës është mbërthyer nga një valë masive presioni të lartë që mundëson të nxehtin tropikal të mbërrijë deri në arktik. Temperaturat mbi 32 gradë celsius janë shtrirë deri në brigjet veriore të Skandinavisë, duke shënuar rekorde në Suedi, Finlandë dhe Norvegji, në stacionet mbi rrethin arktik. Si rezultat, janë verifikuar zjarre të paprecedenta në Suedi që kanë bërë që ajo të kërkojë ndihmë nga vende të tjera, si italia, me më shumë burime për të luftuar zjarret. Britania e Madhe po ashtu ka përjetuar verën më të thatë të saj dhe më të nxehtën po ashtu. Në shkretëtirën e Saharasë, në Afrikën Veriore, më 5 korrik u regjistrua rekordi i të gjitha kohërave, 51.3 gradë celsius, dhe kjo ndodhi në Ourgla të Algjerisë. Një valë të nxehti ekstrem goditi edhe Kanadanë këtë muaj, me të paktën 70 viktima në Kebek. Ndërsa në SHBA, i nxehti i korrikut është shtrirë nga veri- lindja deri në jug- perëndim. Ftohtë dhe nxehtë, lagështirë apo thatësirë, ne i përjetojmë kushtet natyrore të motit gjithë kohën, por ndryshimet klimaterike po kthejnë tani gishtin kundër nesh, duke bërë që disa lloj ekstremesh të jenë më të shpeshta dhe më intensive.