Kontrata për xhirimin e "Gjeneralit…" të Kadaresë, që largoi francezët nga Shqipëria

Ekskluzive/ Zbulohet dokumenti i vitit 1982 për realizimin e filmit italo- francez në Shqipëri Klauzola e kontratës: Filmi duhet të jetë në përputhje me kërkesat dhe marrëveshjen e bërë nga autori i romanit, Ismail Kadareja me "FILMS 66".

Ashtu siç kemi parë edhe në disa kapituj paraardhës, diku nga mesi i vitit 1982, kur shoqëria filmike franceze "FLMS 66", e përfaqësuar nga aktori i njohur Michel Piçoli ishte bërë gati për të ardhur në Shqipëri dhe për të filluar xhirimet e filmit "Gjenerali i ushtrisë së vdekur", ( sipas skenarit të përshtatur nga romani me të njëjtin titull të shkrimtarit të njohur Ismail Kadare), papritur u ndesh me një sërë problemesh të ngritura nga pala shqiptare, e cila iu propozonte për një shtyrje të fillimit të xhirimeve. Gjë e cila për ta, as më shumë dhe as më pak do të thoshte se realizimi i filmit nga ana e tyre ishte në kufijtë e së pamundurës. Propozimi për shtyrjen e filmit iu bë palës franceze në datat 23 dhe 24 gusht 1982 nga vetë titullarja më e lartë e Ministrisë së Arsimit e asaj kohe, Tefta Cami, gjë e cila vinte pas një sërë letërkëmbimesh të bëra më parë me ta dhe që ishin nënshkruar nga funksionarët më të lartë të Ministrisë së Punëve të Jashtme të Shqipërisë, si Reis Malile, Sokrat Plaka, Misto Treska, Javer Malo, Jorgo Melica, Dilaver Pinderi etj. e deri nga drejtori i Kinostudios "Shqipëria e Re", Vangjush Zallëmi e vartës të tij si Gjergji Pano dhe Niko Mitrushi. Kjo gjë vinte pas një sërë zvarritjesh dhe pengesash subjektive që nxirrte shteti shqiptar si psh., përbërja "sekret ushtarak" e disa vendeve ku do vendoseshin francezët me sheshe xhirimi e të tjera absurditete të tilla. Dhe pas gjithë këtyre pengesave, si për t'i "vënë vulën" një vendimi të paramenduar, pala shqiptare me anë të Ministrisë së Punëve të Jashtme, ( urdhri i zv. ministrit, Sokrat Plaka), me anë të një telegrami- shifër tepër sekret njoftonte ambasadat tona në Paris, Romë, Beograd dhe Athinë, ku thuhej: "Urgjente Dt. 26.8.1982. TEPER SEKRET. SHIFRIMI. Koncepti: Në rast se paraqiten për vizë grupi i xhirimit të filmit ' Gjenerali i ushtrisë së vdekur' i përbërë nga: 1. Michel Pikoli, 2. Huge Nacin, 3. Domenigue Tabuteau, 4. Jan Lui Millart, të mos u jepet vizë. Po të paraqiten, na njoftoni dhe prisni përgjigjen tonë".

Por cila ishte arsyeja kryesore që pala shqiptare u nxirrte pretendime pas pretendimesh francezëve dhe a kishte mundësi reale shteti shqiptar për t'i qëndruar korrekt kontratës që kishte lidhur me shoqërinë filmike "FILMS 66"? Nga shumë burime të besueshme bëhet e ditur se pretendimet e palës shqiptare për realizimin e filmit s'ishin gjë tjetër veçse pretekste subjektive të ngritura artificialisht për "t'ua nxirë jetën" francezëve, aq sa i detyroi ata që të tërhiqeshin nga projekti i tyre për realizimin e filmit dhe më pas ta zhvendosnin atë në jug të Italisë, siç dhe ndodhi më pas. Thuhet se problemi kryesor ishte çështja "Kadare", autori i skenarit të filmit, ndaj të cilit pikërisht në ato ditë, në një nga qelitë e hetuesisë të Burgut 313 në Tiranë ( ku zhvillohej procesi hetimor i të ashtuquajturit "Grupi armiqësor i Mehmet Shehut dhe Kadri Hazbiut"), "po rrëfehej" ishministri i Shëndetësisë, Llambi Ziçishti, duke akuzuar edhe Kadarenë si pjesëtar i atij grupi. Por edhe pse dosja "Kadare" u mbyll, filmi "Gjenerali…" nuk u realizua dot dhe arsyet e vërteta nuk u thanë kurrë e nuk janë bërë ende publike edhe sot, pas 29 vjetësh nga shembja e regjimit komunist. Kjo gjë të paktën nga asnjë prej aktorëve kryesorë që u morën me "çështjen" e xhirimit të "Gjenerali i ushtrisë së vdekur", ku shumë prej tyre jetojnë ende. Ndërsa, lidhur me disa nga pengesat artificiale dhe pretendimet e palës shqiptare jemi njohur nga disa dokumente që i kemi publikuar më herët ( korrik- gusht 2017, "Gazeta Shqiptare"), në numrin e sotëm po publikojmë për herë të parë kontratën e palës shqiptare për xhirimin në Shqipëri të filmit "Gjenerali i ushtrisë së vdekur", kontratë e cila nuk u firmos kurrë nga shoqëria filmike franceze, "FILMS 66", e cila pas kësaj u tërhoq dhe i zhvendosi xhirimet në jug të Italisë, ku dhe e realizoi filmin në fjalë me protagonist aktorin e famshëm italian, Marchello Mastrojanni. Ashtu siç do të shohim edhe nga faksimilet përkatëse, në kontratën në fjalë ka shumë shënime me shkrim dore të bëra nga zv. ministri i Punëve të Jashtme të asaj kohe, Sokrat Plaka, i cili në fund të kontratës ka shënuar: "Po për vetë filmin në tërësi, çdo marrim ne"?

KONTRATA

KINOSTUDIO "SHQIPERIA E RE", rruga "Aleksandër Moisiu", 76,