Vasili sulmon Veliajn: Gërmadhat provinciale që urrejnë Tiranën
“Ndërsa në Evropë restaurohet, këtu shkatërrohet”
Kryetari
i grupit parlamentar të Lëvizjes Socialiste për Integrim, Petrit Vasili akuzoi dje kryebashkiakun e Tiranës, Erion Veliaj. Përmes një postimi në rrjetin social "Facebook", deputeti i LSI shkruan se ndërkohë që në Europë restaurohet çdo mur apo ndërtesë që mban gjallë memorien, kulturën e trashëguar dhe korpusin e vlerave intelektuale, në Shqipëri ato shkatërrohen. "Këta bulimistët politikë, që qeverisin Tiranën shkatërrojnë, me histeri të papërmbajtur. Këta të kompleksuarit tanë vuajnë dhe nuk shërojnë dot provincializmin e tyre arkaik, pa ngjyrë, pa moral dhe plot urrejtje për Tiranën; nuk bëhen e nuk bëhen dot qytetarë të saj", shkruan Vasili. "Gërmadhat provinciale, që qeverisin dhe urrejnë Tiranën! Tirana është një e tërë. Tirana ka qenë dhe mbetet përfaqësuese e atyre standardeve shoqërore, intelektuale dhe morale, që e lëvizin përpara vendin. Ç'janë këta kaqola, që na e shpifën me këto numra idiotësh jo 200 mijë andej po 800 mijë këndej. Këta gjithë ditën kanë pjesë të broçkullave të tyre krahasimin me Romën, Parisin, Londrën, Vjenën, Barcelonën etj., etj. Po kanë a dëgjuar këta kaqolët tanë ndonjëherë, që ata burra e gra të mençur dhe pa komplekse, që i drejtojnë ato qytete t'i ndajnë qytetet e tyre në ' kaq mijë njerëz na duhen dhe kaq nuk na duhen'. Idiotësira të tilla vetëm këta tanët në Tiranë mund t'i nxjerrin nga goja", shkroi dje kreu i grupit të LSI- së. "Këta ' budallenjtë' e Europës restaurojnë me merak e dashuri çdo metër mur apo ndërtesë, që mban gjallë memorien, kulturën e trashëguar dhe korpusin e vlerave intelektuale. Ndërsa këta bulimistët politikë, që qeverisin Tiranën shkatërrojnë, me histeri të papërmbajtur. Këta të kompleksuarit tanë vuajnë dhe nuk shërojnë dot provincializmin e tyre arkaik, pa ngjyrë, pa moral dhe plot urrejtje për Tiranën, nuk bëhen e nuk bëhen dot qytetarë të saj", tha Vasili. "Këta duke u hakmarrë ndaj Tiranës dhe duke shkatërruar trashëgiminë e saj, u duket sikur do shërojnë e qetësojnë komplekset e inferioritet e tyre, pa ditur se po i thellojnë ato. Ndaj Tirana i përbuz këta dhe përbuzjen nuk e përcaktojnë numrat, por gërmadhat provinciale të cilat Tirana i bluan, i flak dhe vetëpastrohet prej tyre, siç ka bërë në dhjetëra e dhjetëra vjet, nga ku ka dalë më e shndritshme dhe më e fortë, por edhe më e pastër…", e mbylli komentin e tij Vasili.