Schütz: Gjykata e Lartë e Kushtetuesja të rimarrin aftësitë ligjore sa më shpejt

Ambasadorja gjermane: Jemi krah Shqipërisë për anëtarësimin në BE "Të krijohen këshillat e lartë për plotësimin e vendeve vakante"

Mekanizmi për veri fikimin e gjyqtarëve dhe prokurorëve është një kolonë mbështetëse e reformës së sistemit të drejtësisë në Shqipëri, e cila po mbështetet prej vitesh nga Gjermania", u shpreh dje për ecurinë e procesit të vetingut, ambasadorja gjermane, Susanne Schütz. "Unë e përshëndes faktin që procesi i vetingut, i nisur në muajin mars, ka përparuar mirë. Falë punës së rëndësishme të Komisionit të Pavarur të Kualifikimeve dhe përkrahjes së përkushtuar të Operacionit Ndërkombëtar të Monitorimit, u bë e mundur që në fazën e parë të vetingut të verifikohen shumë gjyqtarë dhe prokurorë, madje edhe të nivelit të lartë. Jam e bindur se një proces verifikimi i pavarur dhe me standarde të njëjta do të ndihmojë në forcimin afatgjatë të shtetit ligjor dhe të besimit të shqiptarëve në sistemin e drejtësisë", u shpreh dje ambasadorja Schütz. "Prandaj është e rëndësishme të krijohen këshillat e lartë për plotësimin e vendeve vakante, si dhe Gjykata e Lartë dhe Gjykata Kushtetuese të rimarrin sa më shpejt të jetë e mundur aftësinë e tyre ligjore. Në këtë kuptim, Gjermania do të mbështesë edhe Shkollën e Magjistraturës në zgjerimin e kapaciteteve të saj arsimuese dhe kualifikuese. Gjermania qëndron krah Shqipërisë, duke mbështetur vendin në rrugën drejt negociatave për anëtarësimin në BE", tha Schütz. Një mbështetje e tillë është shprehur edhe nga të tjerë ndërkombëtarë. Dy ditë më parë, në një intervistë për "Gazeta Shqiptare", raporteri për Shqipërinë në Parlamentin Evropian, Knut Fleckenstein u shpreh i keqardhur për faktin që opozita e maxhoranca nuk mundën të bien dakord në seancën e fundit të Parlamentit shqiptar, për ndry- shimet ligjore për rekrutimin e gjyqtarëve dhe prokurorëve të rinj në Shkollën e Magjistraturës. "Kjo është absolutisht e nevojshme për funksionimin e institucioneve. Shpresojmë se kjo do të bëhet së shpejti", shprehet Fleckenstein në këtë intervistë për "Gazeta Shqiptare". Sa i përket procesit të vetingut, raporteri për Shqipërinë në Parlamentin Evropian u shpreh se Shqipëria duhet të jetë krenare për këtë reformë shumë ambicioze. "Vetingu është thelbësor për të krijuar besim në këto institucione dhe sundimin e ligjit. Në fund të fundit, prova përfundimtare e një reforme të suksesshme duhet të jetë në rezultatet e arritura në sistemin e drejtësisë, duke përfshirë edhe ndjekjen penale të efektshme dhe dënimet për krimin e organizuar.

Fakti që tashmë ka pasur disa shkarkime dhe dorëheqje vullnetare tregon se vetingu po funksionon", deklaroi Knut Fleckenstein. Sa i përket datës së përcaktuar nga Këshilli i Çështjeve të Përgjithshme të Bashkimit Evropian për çeljen e negociatave me Shqipërinë, Fleckenstein tha se do të dëshironte që ajo datë të ishte më afër.