Studimi i BSH: Nuk ka mbështetur sektorët më produktivë

Kreditimi është joeficient

Shpërndarja

e kredive ndërmjet sektorëve të ekonomisë shqiptare nuk ka qenë eficiente dhe në përputhje me zhvillimin ekonomik dhe rrezikun e kredisë të secilit sektor. Një studim i guvernatorit dhe disa ekspertëve të Departamentit të Kërkimeve në Bankën e Shqipërisë ka treguar se për periudhën 2004- 2014, shpërndarja sektoriale e kredisë nuk ka qenë plotësisht në përputhje me zhvillimet makroekonomike dhe situatën financiare të sektorëve të veçantë të ekonomisë. Në disa raste vërehet një mospërputhje kreditimit të sektorit dhe kontributit që ka ky sektor në rritjen ekonomike. Më konkretisht, për sektorin e industrisë dhe të shërbimeve është gjetur lidhje pozitive dhe statistikisht e rëndësishme midis rrezikut të kredisë dhe kreditimit, që tregon se pavarësisht nivelit të lartë të kredive të këqija që kanë pasur këta sektorë, ata kanë vazhduar të financohen nga bankat. Ndërsa rezultatet e marra për sektorin e bujqësisë tregojnë që pavarësisht kontributit që ka sektori në vlerën e shtuar të ekonomisë, ky sektor akoma nuk ka gjetur mbështetjen e duhur nga bankat. Studimi vlerëson se sjellja joeficiente e shpërndarjes së kredisë midis sektorëve ka bërë që disa sektorë të jenë më të preferuar përkundrejt disa të tjerëve. Kjo ka bërë që bankat të sigurojnë mbrojtje për disa sektorë, në kundërshtim me forcat e tregut, të cilat do të sillnin një shpërndarje më të mirë të burimeve në ekonomi dhe si rrjedhojë, një ristrukturim më të mirë të saj. Kjo sjellje pengon ecurinë e zhvillimit të sektorëve më produktivë dhe pasqyron gjithashtu një problem të sjelljes së vetë bankave dhe motivimit të tyre për orientimin e kredisë së re nga e shkuara dhe jo nga tendencat aktuale të produktivitetit dhe rrezikut në sektorët e ekonomisë. Studimi nënvizon se një rishpërndarje joeficiente e kredisë pengon efikasitetin e politikës monetare dhe bëhet pengesë për rimëkëmbjen e ekonomisë.