Frika nga rrëzimi i urës në Xhenova, Tola: Kemi nisur kontrollin e urave në Shqipëri
Drejtori i Policisë Rrugore: Grupe teknike, për të verifikuar strukturat e urave "Do monitorojmë tejkalimin e ngarkesave nga mjetet"
Pas tragjedisë në Xhen ova, Policia e Shtetit ka filluar inspektimin e urave në vendin tonë për të parë gjendjen e tyre, strukturat dhe elementët e sigurisë. Në një konferencë për mediat, drejtori i Policisë Rrugore, Mithat Tola u kërkoi drejtuesve të mjeteve të respektojnë edhe sinjalistikat dhe peshën e automjeteve për kalimin mbi urë. Drejtori i Policisë Rrugore, Mithat Tola tha se janë marrë disa masa dhe nisi inspektimi i peshës së lejuar të mjeteve mbi ura, po ashtu edhe gjendjen e këtyre strukturave dhe të elementeve të sigurisë. "Nisur nga ngjarja tragjike, rrëzimi i urës në Xhenova të Italisë ku humbën jetën 39 persona ka Policia Rrugore ka filluar inspektimin e sistemeve të sinjalizimit vertikal - horizontal mbi tregimin e peshës së lejuar të mjeteve në të gjitha urat e vendit si dhe do të marrë pjesë në vijim në përbërje të grupeve teknike të punës dhe të inspektimit të Ministrisë së Infrastrukturës për të verifikuar gjendjen e të gjitha strukturave dhe elementëve të sigurisë të këtyre urave. Në bashkëpunim me aktorë të tjerë të ngarkuar me ligj për menaxhimin e elementëve të sigurisë në këto infrastruktura, shërbimi i Policisë Rrugore do të monitorojë në mënyrë të rreptë tejkalimin e peshave dhe ngarkesave nga mjetet për të shmangur dëmtimet dhe për të bërë që ata të respektojnë ligjin duke prodhuar më shumë siguri për të gjithë", u shpreh Tola. Gjithashtu, Tola u bëri thirrje drejtuesve të automjeteve të kenë kujdes në timon, pasi fluksi i qarkullimit është rrezik për aksidente. Gjithashtu, kreu i Policisë Rrugore paralajmëroi kontrolle të shpejtësisë në mënyrë elektronike pëmes sistemit radar. Por, përtej përforcimeve nga ana e qarkullimit rrugor, në Shqipëri dhe shtete si Bullgaria, Franca, Gjermania dhe Zvicra janë angazhuar të bëjnë inspektime të gjendjes së urave dhe rindërtimin e tyre në rast amortizimi. Të paktën pesë ura, ajo e Vorës, Kukësit, Milotit, Tapizës dhe Dragotit paraqesin rrezikshmëri. Tola renditi edhe akset më të ngarkuara me qarkullim jetësh dhe trafik, ku Saranda rezultonte qarku më i prekur. Në përfundim të konferencës, Tola u bëri thirrje qytetarëve të denoncojnë çdo abuzim që konstatojnë në rrugë, përfshi manovrat e gabuara, parakalimet e gabuara, shpejtësi tej normave si dhe zënien e korsive nga shoferë të papërgjegjshëm.