Humbi jetën në tragjedinë e Xhenovas, përcillet në banesën e fundit 32- vjeçari Admir Bokrina
Dhimbje në familje, të afërmit: Ishte djalë i mrekullueshëm
SHKODËR - Admir Bokrina, 32 vjeçari nga Shkodra, i cili humbi jetën pak ditë më parë në tragjedinë e Xhenovas, pas shembjes të urës Morandi është përcjellë dje për në banesën e fundit. Të riut nga Oblika iu dha lamtumira e fundit në fshatin e tij, aty ku i lind dhe u bë 12 vjeç para se të emigronte drejt Italisë. Përveçse familjarëve, të afërmeve, miqve dhe të njohurve, në ceremoninë mortore morën pjesë edhe shumë qytetarë të Shkodrës. Në momentin kur arkivoli me trupin e pajetë doli nga shtëpia, të gjithë kanë përjetuar një dhimbje të madhe. Kortezhi mortor u ndal fillimisht pak metra nga rrugica ku banon familja Bokrina për të kryer ritet fetare. Më pas trupi i pajetë u përcoll për t'u prehur përjetësisht tek varrezat e fshatit. Ruzhdi Poda, mësuesi i babait të Admir Bokrinës tha me lot në sy se familja Bokrina duhet të ndjehet krenare, sepse djali i tyre humbi jetën duke shkuar në punë dhe jo duke u marrë me punë të papëlqyeshme në Itali.
"Është një dhimbje shumë e thellë për të gjithë familjarët, por edhe për të gjithë ne të tjerët. Jemi shumë të prekur nga ajo çfarë ka ndodhur. Admir Bokrina ishte një djalë i mrekullueshëm. Ngjarja është shumë e hidhur, por nga ana tjetër familja duhet që të ndjehen krenar sepse djali i tyre humbi jetën duke shkuar në punë dhe jo duke u marrë me banda, me drogë apo me vrasje e gjëra të tjera të papëlqyeshme. Djem të tillë rrit zona, bija të tilla rrit Shqipëria, të cilët shkojnë rrugëve të botës për të punuar dhe për të na bërë krenarë. Unë babait të Admirit i kam dhënë mësim në shkollë. Janë një familje me histori, sepse gjyshi i tyre ka marrë pjesë në luftën e 1912- 1913- ës në malin e Taraboshit në Shkodër. Ndjehemi shumë keq që Admiri nuk jeton më, dhe Zoti i dhëntë forcë familjes. I shprehim ngushëllimet tona", u shpreh Poda. Ndërsa, Muhamet Çeka, një tjetër banor i zonës, i cili e njeh mirë familjen Bokrina dhe ka punuar për shumë kohë me viktimën në Itali, por edhe me babain e tij Asllan Bokrinën pohoi se ndjen keqardhje të madhe për atë që ndodhi, ndërsa tregoi se 32 vjeçari ishte një djalë tejet punëtor. Ndërkaq, babai i viktimës Asllan Bokrina dha vetëm një mesazh të shkurtër: "Faleminderit të gjithëve, ju falënderoj shumë!".