Zbardhet VKM, qeveria vendos rregulla të reja për tokat me qira
Përcaktohen kriteret e reja dhe procedurat për dhënien me qira të pasurive shtetërore Prona për 1 euro, rastet kur të merrni kontrata pa konkurs
Qeveria ka ndry shuar procedurat për marrjen me qira të tokave shtetërore dhe lidhjen e kontratave ' 1 euro'. Është miratuar modeli i ri kontratës, i cili hyn në fuqi sot dhe parashikon përveç rasteve të lidhjes së kontratave pas "konkursit" edhe fitimin e të drejtës pa garë. Ndryshimet ligjore parashikojnë edhe se çfarë do të ndodhë më kontratat ekzistuese pas hyrjes në fuqi të kontratës së re tip dhe ndryshimeve ligjore. Ndryshimet në vendimin për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros të këtyre ndërmarrjeve parashikojnë që investimi duhet të jetë nga 100 milionë lekë deri në 500 milionë lekë dhe parashikon hapjen e të paktën 50 vendeve të reja punë. Bëjnë përjashtim nga ndryshimet kontratat e qirasë dhe enfiteozës, kur ka një investim të rëndësishëm për vendin, që synon tërheqjen e industrive të reja dhe futjen e teknologjive të përparuara, me një nivel investimi mbi 800 000 000 lekë dhe që do të sigurojë jo më pak se 500 vende pune. Afati i lidhjes së kontratave të qirasë është deri në 30 vjet, me të drejtë ripërtëritjeje me afat 30vjeçar, ndërsa afati i lidhjes së kontratave të enfiteozës është deri në 60 vjet. "Ndryshimet parashikojnë se "kontratat e qirasë, të lidhura nga institucionet përgjegjëse, do t'i përmbahen formatit "tip", që i bashkëlidhet këtij vendimi dhe është pjesë përbërëse e tij." Për kontrata me tarifën 1 euro/ kontrata parashikohet se pasuritë shtetërore me sipërfaqe mbi 500 m2 u jepen të tretëve edhe me kontrata qiraje/ enfiteozë, me tarifën 1 euro/ kontrata, me vendim, rast pas rasti, të Këshillit të Ministrave. Sipas vendimit institucioni, që zhvillon procedurën dhe që ushtron të drejtën e përfaqësuesit të pronarit shtet për pasurinë shtetërore, i propozon Këshillit të Ministrave të miratojë lidhjen e kontratës së qirasë/ enfiteozës jo me çmimin fitues, por me çmimin 1 euro/ kontrata kur, pas përfundimit të procedurave të konkurrimit, rezulton fitues një subjekt, i cili propozon që në pasurinë shtetërore do të zhvillojë.
MARRËVESHJA PA GARË
Ministria përgjegjëse për ekonominë propozon në Këshillin e Ministrave dhënien me qira/ enfiteozë të pasurisë shtetërore pa konkurrim dhe me çmimin 1 euro/ kontrata kur, me ofertë "të pakërkuar", ka një propozim për zhvillimin e zonave të veçanta, si për shembull për kontratat e qirasë, me vlerë mbi 100 000 000 lekë, me qëllim ngritjen e qendrave të organizuara sociale, që ndikojnë për zgjidhjen e problemeve sociale ose për ushtrim të veprimtarive në fushën e sportit a të kulturës apo në fushën e turizmit ose të trashëgimisë kulturore. Para nënshkrimit të kontratës së qirasë/ enfiteozës me tarifë 1 euro/ kontrata, qiramarrësi/ enfiteozëmarrësi është i detyruar të kryejë pagesën e garancisë së kontratës në masën 2 për qind të vlerës së investimit të marrë përsipër në konkurrim. Garancia kthehet pas përfundimit të investimit.
SANKSIONET
Në kontratën me tarifë 1 euro/ kontrata vendosen sanksione për rastet kur qiramarrësi/ enfiteozëmarrësi nuk realizon kushtet e saj. Bazuar në parashikimet e kontratës për çdo vend pune, si mesatare vjetore të pahapur, subjekti qiramarrës penalizohet me 50 000 lekë. Për mosrealizimin e vlerës së investimit të parashikuar në kontratë, subjekti qiramarrës/ enfiteozëmarrësi penalizohet me 10 për qind të vlerës së investimit të parealizuar. Ky sanksion do të vendoset pas dorëzimit të pasqyrave financiare vjetore të certifikuara nga eksperti kontabël i miratuar. Nëse investimi nuk realizohet, pas 6 muajve, në rastin e kontratave të qirasë, dhe 12 muajve, në rastin e kontratave të enfiteozës, kontrata zgjidhet në mënyrë të njëanshme nga institucioni qiradhënës ose enfiteozëdhënës, duke mbajtur garancinë e kontratës së qirasë/ enfiteozës. Kontratat e qirasë, të lidhura para daljes së këtij vendimi, ku realizohet veprimtari prodhuese me regjim "Fason", kthehen në kontrata me tarifë 1 euro/ kontrata pas daljes së këtij vendimi, duke ruajtur si garanci kontrate atë të kontratës së qirasë. Specifikimet për rastet dhe procedurat për ndryshimin e këtyre kontratave bëhen me udhëzim të ministrit përgjegjës për ekonominë.