PD, akuza Markut: Po i shërben krimit sipas skenarit të Ramës
"Bego përfitoi 14 mln euro nga tenderat"
Partia
Demokratike ngri ti akuza të forta dje ndaj Prokurorisë për rastin e Edmond Begos, biznesmenit që u ndalua pak ditë më parë nga autoritetet greke për shkak të një dënimi për trafik droge dhënë nga Italia në të kaluarën. Deputeti demokrat Luçiano Boçi akuzoi se "prokuroria po ndjek skenarin e Edi Ramës duke heshtur dhe duke mos nisur hetimet për Taulant Ballën, mikun e tij trafikant droge, dhe këdo që ka shkelur ligjin e prokurimit publik për t'i dhënë miliona euro punë publike një të dënuari si anëtar i organizatave kriminale". "Arrestimi 7 ditë më parë nga autoritetet greke i trafikantit të rrezikshëm të drogës, Edmond Bego, nxori në dritë faktin tronditës se ai u shndërrua në biznesmen të fuqishëm ndërtimi, duke përfituar miliona euro nga buxheti i shtetit, pasi lidhi miqësi familjare me Taulant Ballën. Por qeveria dhe prokuroria kanë zgjedhur të heshtin përballë fakteve, në mënyrë që të mbulojnë me harresë të vërtetën e përfitimit të miliona eurove nga një trafikant droge, në kundërshtim flagrant me ligjin e prokurimit publik. Prokuroria, e cila po provon çdo ditë se i shërben krimit të organizuar të lidhur me pushtetin, po ndjek skenarin e Edi Ramës, duke mos nisur hetimet për Taulant Ballën, mikun e tij trafikant droge, dhe këdo që ka shkelur ligjin dhe i ka dhënë atij miliona euro punë publike", - deklaroi Boçi. Sipas tij, prokuroria hesht, pavarësisht se PD- ja ka paraqitur fakte që provojnë shkeljen e ligjit, për t'i dhënë të paktën 14 milionë euro mikut me 5 emra të Taulant Ballës.