Shkarkohet nga detyra Drejtori i Burgjeve Arben Çuko, motivi: Rritja e sigurisë në burgje
Në vend të tij emërohet Stefan Çipa
TIRANË- Ministrja e Drejtësisë Etilda Gjonaj ka shkarkuar nga detyra Drejtorin e Përgjithshëm të Burgjeve Arben Çuko. Në vend të tij është emëruar Stefan Çipa, ish- kryebashkiaku i Sarandës dhe zëvendës ministër i Brendshëm. Motivacioni i këtij ndryshimi është rritja e sigurisë në burgje. "Largohet nga detyra e Drejtorit të Përgjithshëm të Burgjeve, z. Arben Çuko dhe në vend të tij emërohet z. Stefan Çipa. Ky ndryshim bëhet për të përmirësuar punën e Drejtorisë së Përgjithshme të Burgjeve, veçanërisht në drejtim të rritjes së sigurisë së brendshme dhe kontrollit si dhe rritjes së efikasitetit të luftës kundër korrupsionit në sistemin e burgjeve", thuhet në njoftimin zyrtar të shpërndarë nga Ministria e Drejtësisë. Arben Çuko nga deputet i PS mori detyrën e Drejtorit të Përgjithshëm të Burgjeve në korrik të vitit të kaluar dhe zëvendësoi Arjan Hoxhën, i cili u emërua në këtë post pas marrëveshjes Rama- Basha. Çuko ka qenë anëtar i Komisionit të Sigurisë, Komandant i Gardës së Republikës dhe këshilltar i kryeministrit të Kosovës për Sigurinë. Ndërsa Çipa vjen nga detyra e zv/ ministrit të Brendshëm. Aktualisht është dhe sekretar për emigracionin në PS. Në zgjedhjet e vitit 1997, Çipa u zgjodh deputet i Kuvendit të Shqipërisë për herë të parë, e më pas edhe në 2 legjislatura të tjera. Gjatë legjislaturës 1997- 2002, ka mbajtur funksionin e zv/ kryetarit të Komisionit parlamentar të Sigurisë Kombëtare. Në muajin shkurt 2002, emërohet ministër i Rendit Publik, detyrë që e ushtroi deri në muajin gusht 2002. Në zgjedhjet lokale të vitit 2011, z. Çipa u zgjodh kryetar i Bashkisë së Sarandës, për një mandat 4- vjeçar. Në datë 13 janar 2016, u emërua nga Këshilli i Ministrave, zëvendësministër i Punëve të Brendshme.