Ndërkombëtarët në mbështetje të referendumit, Zaev: Qytetarët do dinë të vendosin
Sekretari i NATO- s në Maqedoni: Votoni referendumin
Jens
Stoltenberg, sekretari i Përgjithshëm i NATO- s, vizitoi këtë të enjte Maqedoninë, në prag të referendumit për marrëveshjen e emrit me Greqinë. Shefi i aleancës ushtarake u dha maqedonasve mesazhin e qartë se anëtarësimi në NATO, por edhe perspektiva europiane, kalon pikërisht nga vota popullore e të 30 shtatorit. "Nëse e implementoni marrëveshjen për emrin, ju do të bëheni shtet anëtar i NATO- s. Shpresoj se herën tjetër kur do jem këtu do të vij në një vend anëtar të aleancës". Për disa javë do të keni referendum ku duhet të vendosni për ardhmërinë, për anëtarësim në NATO dhe në Bashkim Europian. NATO është e gatshme t'iu pranojë si anëtaren e 30- të NATO- s". Pas Sekretarit të Përgjithshëm të NATO- s, Maqedoninë të premten e viziton kancelari austriak Sebastian Kurz, për t'u pasuar më pas nga vizita e së shtunës e Kancelares gjermane Angela Merkel. 30 shtatori po afron dhe partitë në Maqedoni kanë ndezur motorët për fushatën finale para referendumit. Takime të shumta po zhvillohen për të bindur qytetarët se "mbështetja për marrëveshjen me Greqinë dhe suksesi i referendumit janë mundësia e vetme për të ardhmen evropiane të vendit". Opozita maqedonase ende vazhdon të kundërshtojë Marrëveshjen me Greqinë duke e quajtur "kapitulluese për vendin, gjuhën, identitetin dhe kulturën maqedonase", por ajo deri më tani nuk ka dalë me qëndrimin nëse do të bojkotojë referendumin apo do të ftojë qytetarët që të votojnë kundër. Seria e vizitave ndërkombëtare në Maqedoni filloi të mërkurën në mbrëmje me vizitën në Shkup të Sekretarit të Përgjithshëm të NATO- s Jens Stoltenberg, sot viziton Shkupin, kancelari austriak Sebastian Kurz, ndërsa të shtunën Kancelarja gjermane Angela Merkel, vizita e së cilës vlerësohet si historike nga autoritetet e Maqedonisë. Gjermania konsiderohet si një nga shtetet që më së shumti ka mbështetur zgjidhjen e kontestit të emrit me Greqinë si dhe procesin e anëtarësimit të Maqedonisë në NATO dhe BE. Kryeministri Zaev ka shprehur besim të madh se më 30 Shtator, qytetarët do të marrin vendim të drejtë për ardhmërinë e tyre dhe ardhmërinë e shtetit.