Ndryshime në kryesinë e sekretarin e PS, emrat e rinj që ikin e vijnë
Ikën Ulqini, rikthehet Petro Koçi, Fino nënkryetar i Asamblesë Felaj dhe Manja votohen si anëtarë të kryesisë
Partia Socialiste ka bërë dje, ndryshime në sekretarin e saj, duke shtuar emra të rinj në forumet e saj të larta. Anëtarët e Asamblesë Kombëtare kanë votuar në postin e nënkryetarit të këtij forumi Bashkim Finon. Organizimi i partisë i është besuar një deputeti të ri, por një socialisti të hershëm Arben Pëllumbit. Ndërkohë Ulsi Manja dhe Ermonela Felaj do të hyjnë si anëtarë të kryesisë së PS- së. Në forumet e larta të PS- së kanë hyrë emra të rinj, por janë larguar edhe të vjetër. Kështu Musa Ulqini nuk do të mbajë më postin e sekretarit për burimet njerëzore dhe koalicionet. Ky pozicion i është besuar zv. kryeministres Senida Mesi, ndërkohë që zv. ministrja e Brendshme Romina Kuko do të jetë nënsekretare. Elisa Spiropali do të mbajë pozicionin e sekretares për Bashkëqeverisjen dhe Aleancat së bashku me zv. ministrin e Mbrojtjes Petro Koçi, një socialist i vjetër dhe një prej sekretarëve organizativë më të suksesshëm që ka pasur Partia Socialiste ndër vite. Alfred Peza rikthehet në sekretariatin e PS- së në pozicionin e sekretarit për marrëdhëniet me median. Kryetari i PSsë Edi Rama i ka besuar sërish Blerina Gjylametit Koordinimin Elektorale, ndërsa Ilir Beqaj do të jetë sekretari digjital, duke pasur kështu përgjegjësinë e regjistrit të anëtarësisë. Stefan Çipa, pas emërimit në detyrën e Drejtorit të Burgjeve nuk do të jetë më sekretar për emigracionin. Laert Duraj do të zërë këtë pozicion, ndihmuar edhe nga zv. ministrja e Jashtme Artemis Daralo. Sekretar për çështjet zgjedhore do të jetë Bledi Çuçi, i cili do të ketë si nënsekretarë zv. ministrin e Brendshëm, Julian Hodaj dhe një prej avokatëve të njohur të PS- së dhe përfaqësues në KQZ, Eridian Salianjin. Sekretare për marrëdhëniet ndërkombëtare do të vijojë të jetë Teuta Vodo, e cila u propozua nga kryeministri Rama si një njohëse shumë e mirë e Brukselit dhe lidhjeve që ka në Bashkimin Evropian.