Arrestimet e të "fortëve" në Shkodër, gjykata lë 30 ditë në burg Ilir Bajrin dhe 2 të tjerë
Lihet i lirë ish- kampioni i boksit, Astmer Bilali
Gjykata
e Shkallës së Parë në Shkodër dje ka lënë në burg tre nga katër personat e arrestuar nga policia, RENEA dhe FNSH pas vrasjeve mafioze të ndodhura kohët e fundit në qytetin verior. Ndërsa, njëri nga personat që u prangos gjatë operacionit "Forca e ligjit" është lënë i lirë. Bëhet fjalë për 29- vjeçarin Astmer Bilali ( ish- kampion boksi). Togat e zeza të Shkodrës vendosën masën e sigurisë "Arrest shtëpie" me mbikëqyrje policore. Ndërkaq, trupi gjykues la në burg me afat 30 ditor tre shtetasit e tjerë: Ilir Bajri, Emrah Plaku dhe Erogen Brajoviç, të cilët akuzohen nga prokuroria për armëmbajtje pa leje dhe grup të strukturuar kriminal. Por dy akuzat e ngritura nga prokurorja Esmeralda Ndoci duket se nuk kanë bindur gjyqtaren Irida Kacerja, e cila la në qeli tre nga katër të arrestuarit vetëm për akuzën e armëmbajtjes pa leje. Seanca për masën e sigurisë për katër shtetasit u zhvillua me dyer të mbyllura dhe nën masa të rrepta sigurie. Astmer Bilali, Ilir Bajri, Emrah Plaku dhe Erogen Brajoviç ishin të pranishëm në sallën e gjyqit bashkë me avokatët mbrojtës. Lulzim Karini ka në mbrojtje 36- vjeçarin Erogen Brajoviç, ndërsa tre të tjerët mbrohen nga avokati Bujar Hoti. Gjatë seancës, prokuroria kërkoi "Arrest me burg" për katër shtetasit në fjalë, por pala mbrojtëse ka kundërshtuar një gjë të tillë. Në fund Bilali u lirua me masën e sigurisë: "Arrest shtëpie". Ndërkaq, afat 30 ditor për tre të tjerët do të shërbejë që gjykata të njihet me aktet e ekspertimit për sekuestrimet që ka bërë policia dhe provat që prokuroria pretendon. Sipas palës mbrojtëse organi i akuzës nuk ka prova për katër të arrestuarit, ndaj kërkuan lirimin e tyre. Avokatët mbrojtës deklaruan para gjykatës se armët e sekuestruara nuk kanë lidhje me shtetasit e arrestuar, sepse në dokumentacionin përkatës nuk thuhet se ku janë gjetur këto armë dhe të kujt mund të jenë. Sa i përket 6 mjeteve të blinduara që janë sekuestruar, sipas avokatëve mbrojtës janë me dokumentacion përkatës dhe se nuk ka ndonjë shkelje ligjore. Seanca gjyqësore për vendosjen e masës së sigurisë ishte parashikuar që të niste në ora 13: 00, por ka nisur për
mbi një orë me vonesë dhe ka përfunduar rreth orës 16: 00. Për afro 3 orë rruga e gjykatës së Shkodrës ( shumë afër qendrës së qytetit) është monitoruar gjatë gjithë kohës nga policia. se. ni.