Bushati takon Zaev: Shqiptarët t'i thonë "po" referendumit

Ministri i Jashtëm shqiptar, vizitë në Maqedoni

Ministri

për Evropën dhe Punët e Jashtme, Ditmir Bushati u bëri thirrje shqiptarëve në Maqedoni të votojnë "pro" referendumi. Gjatë një vizite në Maqedoni Bushati takoi kryeministrin e Maqedonisë, Zoran Zaev. Biseda u përqendrua tek zhvillimet më të fundit në Maqedoni dhe rajon si dhe sfidat e përbashkëta me të cilat përballet Ballkani Perëndimor. Ministri Bushati vlerësoi lidershipin politik të Kryeministrit Zaev, i cili ka ndërmarrë një qasje të re ndaj fqinjëve për të drejtuar vendin drejt anëtarësimit të plotë në BE dhe NATO. Sipas ministrit Bushati, çelësi i vetëm për hapjen e kësaj rruge është vota PRO Marrëveshjes së Prespës në referendumin e datës 30 shtator. Në këtë kuadër, kreu i diplomacisë shqiptare inkurajoi të gjithë qytetarët e Maqedonisë të ushtrojnë të drejtën e tyre demokratike për të jetësuar në perspektivën e tyre euro- atlantike. "Është detyrë historike e çdo qytetari shqiptar në Maqedoni dhe në diasporë të votojnë masivisht dhe t'i thonë PO Marrëveshjes në Referendum. Po ashtu, është mision jetik i të gjithë spektrit politik shqiptar të shfaqë unitet për të mobilizuar votën masive shqiptare më datë 30 shtator",- nënvizoi ministri Bushati. Të dy zyrtarët u ndalën dhe tek nevoja e hyrjes sa më shpejt në fuqi e ligjit të gjuhëve. Mbi këtë çështje, palët ndanë bindjen se zbatimi i duhur i tij dhe krijimi i shpejtë i mekanizmave të monitorimit siguron një qasje më të mirë dhe më të drejtë ndaj shërbimeve për shqiptarët dhe përfshirjen e tyre në qeverisjen e mirë, politikat e zhvillimit dhe ndërtimin e një shoqërie të hapur, gjithëpërfshirëse dhe të orientuar drejt Europës.