Viti i ri shkollor, drejtori i Rendit: Shtohen masat e sigurisë pranë institucioneve arsimore

si çdo vit të ri shkol lor, Policia e Shtetit ka ndërmarrë masat për rritjen e sigurisë në shkolla. Drejtori i Përgjithshëm i Policisë së Shtetit, me akt të posaçëm ka urdhëruar gjitha instancat policore të studiojnë e vlerësojnë situatën kriminale dhe atë të rendit publik. Mbi këtë bazë, të hartohen plane masash me detyra konkrete për policinë. Me nisjen e vitit të ri shkollor në prani të institucioneve arsimore do të ketë prezence të shtuar policore me qëllim vlerësimin, sqarimin në kohë, ndjekjen me përparësi të informacioneve për parandalimin e çdo akti të mundshëm kriminal në këto ambiente. Në një deklaratë për mediat, drejtori drejtori i Rendit dhe Sigurisë Publike në DPPSH, Albert Dervishaj tha se pranë shkollave do të ndalohet parkimi i mjeteve, do të vendosen sinjalistikat vertikale dhe horizontale si edhe do të mbyllen lokalet dhe pikat ambulante të shitjes. "Nga punonjësit e policisë në bashkëpunim me drejtuesit e institucioneve arsimore dhe të pushtetit vendor janë përcaktuar masat: kufizim apo ndalim i parkimit, qëndrimit dhe lëvizjes së automjeteve në segmente rrugore të caktuara pranë shkollave. Vendosja e sinjalistikës vertikale dhe horizontale, të domosdoshme për disiplinimin e lëvizjes së automjeteve dhe këmbësorëve. Mbyllja apo largimi i lokaleve të tregtisë dhe pikave ambulante të shitjes që tregtojnë pije alkoolike, produkte ushqimore të skaduara apo në ndonjë rast edhe lëndë narkotike pranë shkollave. Dhënia dhe shkëmbim i informacioneve me stafin pedagogjik për nxënësit që mund të mbajnë me vete armë zjarri, armë të ftohta apo sende të tjera të forta të rrezikshme. Mbajtja e kontakteve të vazhdueshme me rojet e shkollave dhe punonjësit e shërbimit të SHPSF- ve, në ato institucione arsimore që e kanë një shërbim të tillë. Vlerësimi i çdo informacioni që ka të bëjë me prishjen e rendit publik, konfliktet, mosmarrëveshjet që mund të kenë nxënësit apo fenomeni i bulizmit", u shpreh Dervishaj.