Aleanca për Mbrojtjen e Teatrit: Nuk kemi frikë
"Po ra Teatri, bie Shqipëria, do ketë konfrontim fizik"
Aleanca
për Mbrojtjen e Teatrit e cilësoi sërish dje antikushtetues ligjin për Teatrin, të miratuar në parlament. Përmes një deklarate, ata shprehen se përpos përmbajtjes, procedura e përdorur për të amenduar një ligj të kthyer nga presidenti është antikushtetuese dhe jotransparente. "Përpjekja e tyre për të zgjidhur problemin e konkurrencës nëpërmjet një tjetër ' ligji special', tashmë i panevojshëm, që detyron këdo të arrijë një marrëveshje paraprake me firmën e përzgjedhur më parë është një tallje edhe me shqetësimet e ngritura nga vetë Komisioni Evropian", vëren Aleanca që mbron Teatrin. Ata bëjnë me dije se përpjekjet e tyre për ta ndaluar sërish këtë çmenduri ligjore e demokratike nuk do të rreshtin. Teksa është shprehur e gatshme të nisë edhe një proces për restaurimin e godinës falë kontributeve private, AMT shton se hapësira për diskutime dhe rrugë institucionale po ngushtohet gjithmonë e më shumë. "Miratimi i ligjit do e fuste Shqipërinë de jure dhe de facto nën një diktaturë, ku Kushtetuta dhe të drejtat që burojnë prej saj nuk kanë më vlerë as formalisht", thuhej në deklaratë. Sipas saj, nuk ka qenë dhe nuk mbetet qëllimi i saj konfrontimi fizik, por fatkeqësisht, "jemi gjithmonë e më të qartë që nga ana e qeverisë gjasat për një kthim mbrapa janë gjithmonë e më të vogla". AMT e cilëson "tragjedi historike që 28 vjet pas rënies së diktaturës, jemi rikthyer në një pikë të tillë. Është e paimagjinueshme që një grup intelektualësh, të burgosur dikur nga regjimi komunist, shprehen sot se janë të gatshëm të futen edhe një herë në burg në mbrojtje të Kushtetutës dhe të Teatrit. Por nëse është vërtet kështu, ne nuk i frikësohemi asaj". Në fund, Aleanca shprehet se mbetet e bindur në idenë se po ra Teatri, ka rënë dhe Shqipëria. "Ndaj më shumë se kurrë janë të bindur e të gatshëm ta mbrojnë Teatrin deri në fund!".
"SULMOHEN" AKTORET
Persona të panjohur fyen dje pranë Teatrit Kombëtar aktoret e shquara Yllka Mujo dhe Eva Alikaj me fjalor vulgar. Sindikata e Artistëve të Skenës dhe Ekranit proteston ndaj çfarëdo cenimi të dinjitetit të cilitdo artist, pavarësisht shkaktarit dhe shkakut. Artistët, pavarësisht qëndrimeve të tyre publike, janë qytetarë dhe duhen respektuar si të tillë. Kushdo që fyen artistët nuk mund të paraqitet si mbrojtës i Teatrit!