Takimi me Metën, Mustafa: Ndryshimi i kufijve, i rrezikshëm e i papranueshëm
Presidenti
Ilir Meta mori pjesë dje në përurimin e sh tatore në Drenas të Kosovës, të dy të rënëve në luftën çlirimtare të Kosovës, bashkëshortët Fehmi dhe Xhevë Lladrovci. "Le t'i themi faleminderit heroit Fehmi Lladrovcit dhe heroinës Xhevë Krasniqi- Lladrovcit, që na bashkuan të gjithëve sot këtu për t'u uruar rikthimin në bronz në Drenas, në Drenicë e në Kosovë, pasi ata janë jo vetëm nderi i historisë së lavdishme të Ushtrisë Çlirimtare të Kosovës, por janë nder i mbarë kombit shqiptar. Sepse janë një shembull i jashtëzakonshëm i sakrifikimit më sublim në emër të lirisë dhe të emër të idealeve më të mëdha, të cilat sollën Kosovën e lirë dhe Kosovën e pavarur", deklaroi z. Meta. Të pranishëm në ceremoni ishte edhe Presidenti i Kosovës Hashim Thaçi, kryeministri Ramush Haradinaj dhe kryetari i Kuvendit të Kosovës, Kadri Veseli si dhe shumë ishluftëtarë të UÇK- së. Po dje kryetari i LDK- së, Isa Mustafa zhvilloi sot një takim me presidentin Ilir Meta. Gjatë bisedës, dy zyrtarët folën për çështjen e shkëmbimit të territoreve mes Kosovës dhe Serbisë. Ishte vetë z. Mustafa, ai që komentoi takimin me Metën në "Facebook". "Kisha kënaqësinë të pres në takim Presidentin e Republikës së Shqipërisë, Ilir Meta. Presidentit Meta i prezantova pikëpamjet e LDK- së se dialogu ndërmjet Republikës së Kosovës dhe Serbisë duhet të jetë forma e vetme e normalizimit të raporteve, por se dialogu duhet të vazhdojë me institucione që kanë legjitimitet të konfirmuar nga zgjedhjet e parakohshme dhe të lira. Po ashtu, i rikonfimova Presidentit Meta pozicionin e paluhatshëm të LDK- së se hapja e temës së ndryshimit të kufijve është e papranueshme dhe e rrezikshme, sepse kjo e rihap temën e mbyllur me deklarimin e pavarësisë dhe se diskutimi i kufijve është në kundërshtim me Kushtetutën e Kosovës. Në këtë takim po ashtu shpreha falënderimin tim për Presidentin Meta, për interesimin e tij të vazhdueshëm në procesin e rehabilitimit tim shëndetësor", shkruan Mustafa.