Arrestimi i mjekëve, protestojnë kolegët: Të lirohen, Shkodra është në emergjencë mjekësore
"Akti i paprecedent, prokuroria të rishikojë vendimin"
SHKODER - Një ditë pas arrestimeve në spitalin e Shkodrës, ka reaguar komisioni mjekësor në këtë institucion. Përmes një deklarata për shtyp ata e quajnë një akt të paprecedent arrestimin e bluzave të bardha. Mjeku Gëzim Galiqi duke folur edhe në emër të kolegëve tha se komisioni mjekësor konteston masën ekstreme të arrestimit të personelit të spitalit të Shkodrës. Ky komision i kërkon prokurorisë të rishikojë masat e marra për faktin se bluzat e bardha të ndaluara për- faqësojnë figura të rëndësishme në sistemin shëndetësor të Shkodrës duke mbuluar shërbime shëndetësore si hemodinamika dhe ndërhyrjet invasive për sëmundje të rënda të zemrës që rrezikojnë jetët e pacientëve si infarkti i zemrës. Të gjithë këta pacientë pas arrestimeve janë të pambuluar në shërbimin e hemodinamikës dhe kardiologjisë. Në kushtet edhe të mungesës së mjekëve specialistë vijon deklarata, mungesa e specialistëve të ndaluar është e pazëvendësueshme. Më tej në deklaratë thuhet se "Në sistemin shëndetësor krejtësisht të vertikalizuar asnjë vendim financiar nuk merret pa u konsultuar me institucionin e linjës ndaj edhe vëmë në dyshim protagonizmin e bluzave të bardha. Aksioni i komisionit do vijojë të përshkallëzohet në ruajtje të figurës së mjekut tashmë të nëpërkëmbur". Mjeku Galiqi tha se kolegët e tij janë të fundit që kanë përgjegjësi, sepse blerjet dhe tenderët bëhen nga vetë ministria dhe se mjekët si pjesë e komisioneve të ndryshme firmosin në të mirë të institucionit. Nga ana tjetër, mjeku Luan Bajri tha se është e vërtetë që në 2016 janë përdorur te hemodinamika vetëm 3 stenda që janë unaza për zgjerimin e enëve të gjakut, por të mos harrojmë vijoi më tej se në atë vit ky shërbim bëhej për herë të parë në një qytet jashtë Tiranës dhe se për stafin atëherë ishte një sfidë. Më pas ndërhyrjet janë shpeshtuar tha mjeku Bajri duke bërë të ditura edhe shifrat. Në 2017 janë përdorur 42 stenda dhe këtë vit deri tani janë përdorur 24 stenda. Sa i përket stokut, mjeku Bajri u shpreh se kjo nuk është përgjegjësi e bluzave të bardha, por është një rakordim mes farmacisë dhe ministrisë dhe se mjekët nuk kanë dijeni për gjendjen në magazina, por thjeshtë bëjnë kërkesat vjetore që kanë.