Meta takon Trump: Partneritet i fortë strategjik mes Shqipërisë dhe SHBA
Kreu i shtetit në Nju Jork, foto familjare me Presidentin e SHBA Presidenti merr mbështetjen për negociatat nga Polonia e Qipro
Presidenti i Republikës, Ilir Meta mori pjesë dje në pritjen e organizuar nga Presidenti i SHBAve, Donald Trump. Ata kanë realizuar edhe një foto së bashku, pas takimit. Vetë Presidenti Meta shkroi në rrjetin social "Facebook" pas pritjes së Trump: "I kënaqur që mora pjesë në pritjen e Presidentit të SHBA, Donald Trump. Partneritet i fortë strategjik mes Shqipërisë dhe SHBA". Kreu i shtetit ndodhet në Nju Jork, në kuadër të pjesëmarrjes në punimet e Asamblesë së Përgjithshme të OKB- së. Dje ai pati disa takime me personalitete botërore. Presidenti Meta u takua me Mbretin e Mbretërisë Hashemite të Jordanisë, Abdullah II. Sipas njoftimit të Presidencës, ai vlerësoi marrëdhëniet shumë të mira midis dy vendeve, si dhe theksoi rëndësinë që këto marrëdhënie të marrin një hov të ri në të ardhmen. "Bashkëpunimi dypalësh, veçanërisht në fushën e sigurisë, por edhe interesi në rritje për të bashkëpunuar në aspektin ekonomik apo të shëndetësisë janë fusha që duhet t'i nxisim e promovojmë më tej", - nënvizoi Presidenti Meta. Në mënyrë të veçantë Presidenti Meta vlerësoi angazhimin dhe rolin shumë të rëndësishëm që Mbretit Abdullah II dhe Jordania luajnë për paqen dhe sigurinë në rajonin e Lindjes së Mesme. Nga ana e tij, Mbreti Abdullah II e vlerësoi shumë bashkëpunimin me Shqipërinë dhe me kënaqësi pranoi ftesën e Presidentit Meta për të zhvilluar një vizitë zyrtare në Shqipëri. Në vijim të ndjekjes së punimeve të Asamblesë së Përgjithshme të Organizatës së Kombeve të Bashkuara, Presidenti i Republikës, Ilir Meta, u takua me Presidentin e Republikës së Qipros, z. Nicos Anastasiades. Presidenti Meta e falënderoi homologun qipriot për mbështetjen që ai personalisht dhe Qipro i japin çeljes së negociatave të anëtarësimit të Shqipërisë në Bashkimin Europian. Gjithashtu, Presidenti Meta nënvizoi interesin për t'i forcuar më tej marrëdhëniet midis dy vendeve, veçanërisht në aspektin ekonomik dhe për t'u dhënë atyre më shumë rezultate substanciale. Në mënyrë të veçantë, Presidenti Meta nënvizoi interesin për të bashkëpunuar ngushtë në kuadër të rajonit të euromesdheut dhe kontribuuar së bashku për forcimin e paqes dhe stabilitetit në këtë rajon. Nga ana e tij, Presidenti Anastasiades e siguroi z. Meta për vijimin e mbështetjes së Shqipërisë në kuadër të BE- së, si dhe shprehu dëshirën për të shkëmbyer vizita në nivel pres- identi në dobi të forcimit të marrëdhënieve mes dy vendeve. Një tjetër takim ishte edhe ai me Presidentin e Polonisë, z. Andrzej Duda. Të dy bashkëbiseduesit ndanë të njëjtin mendim lidhur me marrëdhëniet shumë miqësore e të bashkëpunimit prej dekadash mes dy vendeve dhe nevojën e forcimit dhe in- tensifikimit të mëtejshëm të tyre në të ardhmen. Në mënyrë të veçantë të dy presidentët vlerësuan rritjen e interesit dhe të bashkëpunimit në fushën e turizmit dhe numrin gjithnjë në rritje të turistëve polakë që vizitojnë Shqipërinë. Presidenti Meta shprehu mirënjohjen për mbështetjen që Polonia i jep procesit të integrimit europian të Shqipërisë dhe çeljes së negociatave të anëtarësimit në Bashkimin Europian. Gjatë bisedës u vlerësuan edhe mbështetjet reciproke për kandidaturat e të dy vendeve në Këshillin e Sigurimit të OKB- së dhe organizata të tjera ndërkombëtare. Kreu i shtetit, Ilir Meta mori pjesë edhe në Forumin Global të Biznesit "Bloomberg 2018". Në këtë aktivitet ndërkombëtar ku marrin pjesë drejtues shtetesh dhe investitorët më të fuqishëm në botë, Presidenti Meta është takuar me Mike Bloomberg, investitorin, politikanin dhe filantropin e njohur në arenën ndërkombëtare.