Gjonaj në Bruksel, nis "sreening": Reforma në drejtësi e pakthyeshme
Katër ministra të Jashtëm të BE- së do të vijnë në Tiranë: Mbështetje për negociatat Takimi i 27- 28 shtatorit shënon fillimin e punës teknike
Vendet e Bashkimit Europian vijojnë të mbështesin negociatat e Shqipërisë për anëtarësimin në BE. Këtë radhë në New York u takuan ministrat e jashtëm të Greqisë, Bullgarisë, Rumanisë e Kroacisë në cilësinë e katër vendeve ballkanike anëtare në Union. Në takim kryediplomatët ranë dakord të vizitojnë Shqipërinë për të ndihmuar në procesin e bisedimeve. Lajmin e bëri të ditur Ministri i Jashtëm i Greqisë, Nikos Kotzias. "Ne sapo përfunduam mbledhjen e katër shteteve të Ballkanit që janë anëtarë të Bashkimit Europian. Ne ramë dakord për të forcuar bashkëpunimin tonë para së gjithash për të stabilizuar rajonin tonë. Ne planifikojmë deri në fund të vitit që të katër të vizitojnë Shqipërinë dhe Maqedoninë veriore për të parë se si mund t'i ndihmojmë ata në qasjen e tyre evropiane", tha Kotzias. Në New York në kuadër të punimeve të asamblesë së OKB pritet dhe një takim dypalësh mes Ministrit për Europën dhe Punët e jashtme Ditmir Bushati me homologun grek Nikos Kotzias. Ndërkohë Shqipëria dhe Maqedonia nisën dje, në Bruksel takimin e parë shpjegues të legjislacionit të BE- së për kapitullin e 23- të të negociatave të anëtarësimit "Gjyqësori dhe të Drejtat Themelore". Ky është i pari i një serie takimesh që do të zhvillohen me Komisionin Evropian për kapituj të ndryshëm të negociatave të anëtarësimit. Fillimi i këtij procesi vjen në vijim të vendimit të Këshillit të Ministrave të BE- së në qershor, i cili përcaktoi rrugën për hapjen e negociatave me Shqipërinë dhe autorizoi Komisionin për fillimin e punës përgatitore. Takimi i 27- 28 shtatorit shënon fillimin e punës teknike të negociatave të anëtarësimit, nëpërmjet së cilës Shqipëria fiton kohë në procesin e mirëfilltë të negociatave. Delegacioni shqiptar në këtë takim kryesohet nga ministrja e Drejtësisë, Etilda Gjonaj dhe zv/ ministri për Evropën dhe Punët e Jashtme, Gent Cakaj. Ministrja Gjonaj ka theksuar se reforma në drejtësi është një proces i pakthyeshëm tashmë dhe se ajo po jep rezultatet e para shumë të rëndësishme për pastrimin e sistemit gjyqësor nga gjyqtarët dhe prokurorët e korruptuar. Ky është i pari i një serie takimesh që do të zhvillohen me Komisionin Europian për kapituj të ndryshëm të negociatave të anëtarësimit. Takimet e shpjegimit të legjislacionit të BE dhe të ekzaminimit të shkallës së përputhjes së legjislacionit të vendit kandidat normalisht zhvillohen pas hapjes zyrtare të negociatave. Gjatë takimit, delegacioni shqiptar do të njihet me aktet ligjore dhe politikat kryesore të Bashkimit Europian që synojnë ngritjen dhe zhvillimin e një sistemi drejtësie të pavarur dhe efiçent. Në takim, gjithashtu, trajtohen lufta kundër korrupsionit dhe të drejtat themelore të njeriut e të drejtat e qytetarëve të Bashkimit Evropian, sikurse garantuar nga Karta e të Drejtave Themelore dhe legjislacioni i Bashkimit Evropian, duke përfshirë këtu mbrojtjen e të dhënave personale, barazinë gjinore, mbrojtjen e të drejtave të fëmijëve, mbrojtjen e minoriteteve, përfshirjen e Romëve, etj.