Protesta para Kryeministrisë: Të reagojmë sot, se nesër do të jetë vonë!
Gratë deputete, në mbrojtje të Xhiselës
moton "Të reagojmë sot, se nesër do të jetë vonë" gratë përfaqësuese të shoqërisë civile u mblodhën dje përpara Kryeministrisë si protestë në mbështetje të Xhisiela Malokut, vajzës së dhunuar nga djali i deputetit socialist, Rrahman Rrahja. Ata kërkuan që rasti i Xhisielës të mos kalojë në heshtje institucionale, por është koha për një reagim të fortë ndaj dhunës barbare. Protestës iu bashkuan dhe deputetet gra të opozitës, që akuzuan drejtpërdrejtë atë që e konsiderojnë mbështetje institucionale ndaj djalit të deputetit Rrahja. Deputetja e PD, Dhurata Çupi, njëherësh sekretarja e Aleancës së Grave, u ka bërë apel kolegeve të shumicës. "Thërritini ndjenjës njerëzore të mëmësisë dhe denonconi ngjarjen e paprecedentë. Kërkojmë që kryetari i Kuvendit, presidenti, kryeministri, ministri i Brendshëm, prokuroria dhe të gjitha institucionet të prononcohen, jo vetëm të distancohen, por të dënojnë me forcë këtë ngjarje. Ndaj djalit të deputetit, që është denoncuar për dhunën nuk është marrë asnjë masë, kemi mosreagim nga Ministria e Brendshme dhe kreu i Policisë së Shtetit. Ndaj vajzës nuk është marrë asnjë masë mbrojtjeje. Duam të informohemi për çdo masë që do të merret për jetën dhe sigurinë për Xhiselën", - tha zj. Çupi. Kurse Oriola Pampuri deklaroi: "Dhuna ndaj Xhisielës hapi një plagë, e cila dhëmb njëlloj për të gjitha ne këtu. Për të gjitha ju zonja, vajza dhe gra që na ndiqni dhëmb njëlloj dhe është përdhunimi ndaj saj, në fakt është përdhunim i gjithë shoqërisë sonë". Kurse Klajda Gjosha tha: "Ka të bëjë me dhunimin që i bëhet gjithë shoqërisë përmes bandave dhe vetë njerëzve".