Ilir Meta në Uashington: Ndryshimi i kufijve hap "Kutinë e Pandorës"
Presidenti takon senatorin republikan Roy Blunt: SHBA, partneri ynë strategjik "Referendumi në Maqedoni të shërbejë si sinjal zgjimi"
Presidenti i Republikës, Ilir Meta u prit në Uashington, në Senat, në një takim të veçantë nga senatori Roy Blunt, zëvendëskryetar i Konferencës të Senatorëve Republikanë. "SHBA- të - theksoi Presidenti Meta - janë partneri ynë strategjik, ndaj forcimi i mëtejshëm i këtyre marrëdhënieve është i një rëndësie vitale për ne. Angazhimi i SHBA në rajonin tonë mbetet kyç edhe për të ardhmen, në mënyrë që të konsolidohen arritjet e deritanishme si në drejtim të stabilitetit e sigurisë, ashtu edhe të përparimit të demokracisë e prosperitetit. Ndaj ne mbështesim fuqishëm politikën e dyerve të hapura të NATO- s dhe pas anëtarësimit të Malit të Zi, vlerësojmë se edhe anëtarësimi i Maqedonisë në NATO do të ishte një arritje tepër pozitive për të ardhmen e të gjithë rajonit tonë", tha Meta. Presidenti i Republikës, Ilir Meta gjatë vizitës së tij në Uashington D. C mbajti një ligjëratë si i Ftuar Nderi i Qendrës së Analizave Politike Europiane ( CEPA) në Universitetin "John Hopkins". Në aktivitet ishin të pranishëm diplomatë, ambasadorë, analistë dhe studiues politikë diplomatë, studentë etj. Gjatë ligjëratës së tij, Presidenti Meta u shpreh: "Me tri zhvillime të rëndë- sishme që po ndodhin në të në vazhdimësi, si dhe me procese të hapura integruese në NATO dhe në Bashkimin Europian, Ballkani mbetet ende një punë e papërfunduar". "Dua të theksoj faktin se ndërhyrja e NATO- s dhe veçanërisht përfshirja e SHBA- ve dhe ajo e mëvonshme e BE- së ishin jetësore për Ballkanin atëherë, siç janë domethënëse e të lidhura me të edhe tani", theksoi Presidenti i vendit. Meta u shpreh se, "faktori shqiptar ka qenë dhe vazhdon të jetë një katalizator jetik për ta zgjeruar hapësirën e kufijve të NATO- s dhe BEsë në këtë rajon, pasi NATOja dhe BE- ja mbeten bazat e qëndrueshmërisë në Ballkanin Perëndimor". Duke folur për referendumin në Maqedoni, Meta u shpreh: "Ai duhet të shërbejë si një sinjal zgjimi, duke na rikujtuar se edhe marrëveshjet më të mira të mundshme e me mbështetje të qartë dhe të gjerë ndërkombëtare, nuk janë edhe aq të lehta për t'u zbatuar në një kontekst të ndërlikuar. Shpresoj se edhe kjo marrëveshje do të gjejë rrugën e saj në Parlamentin maqedonas dhe do t'i hapë Maqedonisë dyert për në NATO dhe BE. Gjithashtu, e vlerësoj faktin se ata që morën pjesë në këtë referendum, mbështetën qartazi këtë rrugë duke votuar në favor të kësaj marrëveshjeje", tha më tej Meta. "Propozimi më i fundit për normalizimin e marrëdhënieve Kosovë- Serbi është kohë e çuar dëm. Do përbënte çelësin e hapjes së Kutisë së Pandorës, në kuptimin më të keq të saj. E paimagjinueshme që dialogu KosovëSerbi të prodhojë një marrëveshje, e cila do ndryshonte kufijtë sipas vijave etnike", tha Presidenti. "Më e rëndësishmja është t'u japim të rinjve mesazhin e sigurisë për të ardhmen e tyre, gjë që vjen dhe mund të bëhet e mundur vetëm nëpërmjet forcimit të bashkëpunimit, marrëdhëniet të mira fqinjësore si dhe bashkëjetesës ndëretnike dhe respektimit të pakicave kombëtare", u shpreh Meta.