I sekuestrohen 1 mln euro pasuri fierakut të dënuar me 32 vite burg në Itali për trafik droge
50- vjeçarit i vihet nën sekuestro kompleksi "Pelikani"
FIER - Policia e Fierit ka sekuestruar dje 1 milion euro pasuri të paluajtshme Vangjel Ziajt ( Arben Gropa), pasi dyshohet se i ka vendosur përmes aktivitetit kriminal dhe konkretisht nga trafiku i drogës. Sekuestrimi është bërë në kuadër të operacionit "Forca e Ligjit". 50- vjeçari është personazh i njohur nga policia dhe aktualisht ndodhet në burg në shtetin italian për trafik droge. Ndërkaq, në Shqipëri ndaj tij ka një hetim të hapur për pastrim parash. "Në kuadër të luftës kundër krimit të organizuar dhe pastrimit të parave, gjurmimit, gjetjes, sekuestrimit me qëllim konfiskimi të aseteve kriminale që rrjedhin nga veprimtaria kriminale, është hapur procedimi penal i regjistruar për veprën penale "Pastrimi i produkteve të veprës penale ose veprimtarisë kriminale" parashikuar nga Neni 287 i Kodit Penal për hetime të pasurisë së shtetasit Vangjel Ziaj ( Arben Gropa)", thuhet ndër të tjera në njoftimin zyrtar të policisë. Po të njëjtat burime bënë me dije se në përfundim të vep- rimeve të kryera, nga ana e sektorit për hetimin e krimit ekonomik e financiar në Drejtorinë Vendore të Policisë Fier në bashkëpunim me prokurorinë, u zbatua vendimi i Gjykatës së Rrethit Gjyqësor Fier për sekuestro preventive në lidhje me pasuritë e shtetasit Vangjel Ziaj, banues në Fier. Ky shtetas është dënuar nga autoritetet italiane me 32 vjet e 6 muaj burg për veprën penale "Trafiku i narkotikëve" dhe është duke vuajtur dënimin në Itali. Pasuritë e sekuestruara që kapin vlerën e 1 milion euro janë: kompleks shërbimesh "Pelikani" i ndodhur në lagjen "Sheq i Madh" Fier; një apartament me sipërfaqe 70 metra katrorë në lagjen "Kryengritja e Fierit" si dhe një automjet i markës "Benz". Policia vijon punën për identifikimin e pasurive të tjera që mund të ketë ky shtetas dhe personat e lidhur me të. 50- vjeçari Vangjel Ziaj i njohur edhe si Arben Gropa u arrestua në janar të vitit 2014, pasi ishte dënuar nga drejtësia italiane për trafik droge me vlerë rreth 300 milionë lireta. Në pritje të ekstradimit, ai u la në arrest shtëpie nga autoritetet sh- qiptare, por u arratis 7 muaj më pas.
Ndërkohë që një rreth vit më pas u arrestua dhe u ekstradua në Itali për të vuajtur dënimin. Gropa është pronar i lokalit luksoz "Pelikani" në këtë qytet, si dhe aksioner në ndërtime.