Sekuestrohet karburanti në pronësi të familjes Habilaj

VLORË - Një tjetër pasuri e Habilajve është sekuestruar dje në Vlorë me urdhër të Prokurorisë së Krimeve të Rënda. Nën sekuestro është vënë një karburant që ndodhet pranë spitalit të qytetit bregdetar dhe që është në pronësi të Artan Habilajt, vëllai i Moisi dhe Florian Habilajt, të cilët dyshohet se janë drejtues të grupit që trafikonte lëndë narkotike drejt Italisë. Artan Habilaj vijon të jetë në kërkim nga autoritetet shqiptare si pjesë e bandës së trafikut të kanabisit. Mësohet se sekuestrimi i karburantit "H. Oil" është bërë nga Antikrimi Ekonomik, ndërsa ky vendim u mor me arsyetimin se ky biznes nuk justifikon të ardhurat. Ndërkohë, prokuroria bëri me dije se mbyllja e biznesit do të jetë deri në një afat të papërcaktuar. Më 21 shtator të këtij viti, prokuroria sekuestroi 31 pasuri të familjes Habilaj, mes tyre janë dhjetë apartamente, vlera e të cilave varion nga 40 mijë euro deri në 200 mijë.; 6 automateve të llojeve të ndryshëm vlerë e të cilave shkon në mijëra euro. Nën sekuestro u vendos gjithashtu edhe një truall me vlerë 205 mijë euro. Të njëjtin fat kanë pasur dhe disa ndërtesa, të cilat përdoreshin për biznes nga anëtarët e familjes Habilaj. Aktualisht në Itali është duke u zhvilluar procesi gjyqësore ndaj Mosi Habilaj dhe pjesëtarëve të tjerë të grupit, të cilët u arrestuan një vit më parë atje. Ky grup dyshohet se ka trafikuar drejt Italisë 3,5 tonë kanabis me vlerë tregu 20 milionë euro. Nga përgjimet e autoriteteve italiane, vëllezërit Habilaj, të cilët janë kushërinj të largët të Saimir Tahirit përmendin edhe emrin e ish- ministrit, çështje për të cilën ai po hetohet.