"Luarasi" nis regjistrimet për master në Teknologjinë e Informacionit dhe Inovacionit
Zv. rektorja për kërkimin shkencor: Ja çfarë do të ofrojnë 2 programet e reja për studentët Anni Dasho Sharko: Risitë për vitin akademik 2018- 2019
Universiteti "Luarasi" ka hapur dyert për të gjithë të interesuarit që dëshirojnë të vazhdojnë studimet master në programet e studimit pranë fakultetit më të ri, atij të Teknologjisë së Informacionit dhe Inovacionit. Për herë të parë "Luarasi" do të ofrojë programe jo vetëm për ciklin të parë të studimeve bachelor në fushën e teknologjisë, por edhe në ciklin e dytë master. Zv. rektorja për kërkimin shkencor pranë KU "Luarasi", Anni Dasho Sharko tregon për "Gazeta Shqiptare" se për vitin e ri akademik 20182019, universiteti do të ofrojë masterin profesional për Sigurinë Kibernetike dhe Informacionin si dhe masterin shkencor për Teknologjinë e Informacionit dhe Inovacionit. "Këtë vit të ri akademik, Universiteti ' Luarasi' vjen me një fakultet të ri, atë të Teknologjisë së Informacionit dhe Inovacionit. Në pjesën e programeve master kanë nisur regjistrimet. Dy programet që ofrohen këtë vit në ciklin e dytë të studimeve janë master profesional për Sigurinë Kibernetike dhe Informacion si dhe master shkencor për Teknologjinë e Informacionit dhe Inovacionit", - thotë Sharko për ' GSH'.
SYNIMI
Këto programe kanë për qëllim të sigurojnë një lidhje organike mes teknologjisë së informacionit dhe biznesit. Në mba- rim të këtij cikli, të diplomuarit do të kenë mundësi jo vetëm të identifikojnë nevojat e biznesit, por të propozojnë edhe zgjidhje mbështetur në këto teknologji të kohës. "Programet master në Teknologjinë e Informacionit dhe Inovacionit kanë si qëllim të krijojnë një urë midis teknologjisë së informacionit dhe biznesit, pse jo edhe sistemit të qeverisë. Programi ndihmon jo vetëm individët që kanë njohuri teknike, por edhe ata me eksperiencë në fusha të tjera", - shton zv. rektorja për kërkimin shkencor pranë "Luarasit". Më tej ajo thekson se studentët në këtë program do të kenë mundësinë të zhvillojnë perspektivën holistike, lidhur me teknologjinë dhe bizneset si dhe kanë mundësi të mësojnë se si të identifikojnë nevojat e biznesit dhe të zhvillojnë strategji të ndryshme teknologjike për të plotësuar këto nevoja. "Studentët gjithashtu do të kenë mundësi të krijojnë raste për të vlerësuar dhe justifikuar investime të ndryshme të bizneseve në teknologji, si dhe të komunikojnë në mënyrë efektive me liderët e biznesit për teknologjinë", - thotë Sharko. Ajo më tej shton se profili i sigurisë kibernetike dhe i sistemeve të informa- cionit është një përgjigje e drejtpërdrejtë për kërkesën e bizneseve dhe tregut të punës në fushën e teknologjisë së informacionit.
REGJISTRIMI
Të gjithë të interesuarit mund të drejtohen pranë sekretarisë mësimorë të KU "Luarasi" për të vijuar me procesin e regjistrimit në programet master mbi fushën e teknologjisë së informacionit dhe inovacionit. "Regjistrimet janë të hapura për të gjithë studentët e nivelit master dhe afati i fundit është data 6 nëntor. Studentët janë të hapur të vijnë të konsultohen me pedagogët e Fakultetit të ri të Teknologjisë së Informacionit dhe Inovacionit për të bërë zgjedhjen e duhur, si në masterin profesional me 60 kredite për sigurinë Kibernetike dhe Informacionit, ashtu edhe në masterin shkencor 2- vjeçar me 120 kredite për Teknologjinë e Informacionit dhe Inovacionit", - thotë zv. rektorja e kërkimit shkencor. Kjo risi në universitetin "Luarasi" dëshmon edhe njëherë se ky institucion elitar i arsimit të lartë u afrohet çdo ditë e më shumë nevojave të tregut me programe studimi që sigurojnë punësim në të ardhmen.
Më datën 14.05.2018 Ministria e Arsimit, Sporteve dhe Rinisë me Vendimin Nr. 266 aprovoi hapjen e një Fakulteti të ri për Teknologjinë e Informacionit dhe Inovacionit ku përfshihen tri departamente: Departamenti i Teknologjisë së Informacionit e Inovacionit, Departamenti i Informatikës Ekonomike dhe Departamenti i Matematikës e Statistikës. Sot askush nuk mund të vejë në diskutim rolin e pazëvendësueshëm që luajnë teknologjitë e informacionit në jetën ekonomike, sociale dhe politike, çka solli nevojën e krijimit të një fakulteti të ri. Termat shoqëri informacioni, revolucion informatik, "fshati global", revolucioni i dijes, revolucioni në fushën e komunikimit etj., kanë fituar qytetari në fjalorin e zakonshëm ditës. Këto teknologji kanë ndikuar dhe po ndikojnë fuqimisht në globalizmin e kulturës dhe komunikimit, pjesëmarrjen në politikë, kujdesin shëndetësor, shërbimet publike, aktivitetet kulturore, veprimtarinë qeverisëse, biznesin, edukimin në distancë, sistemin bankar, aeronautikën, aviacionin, mbrojtjen, shërbimet inteligjente, kërkimin shkencor, rrjetet sociale, postën elektronike, tregtinë ' online', telefoninë celulare, teknologjitë audiovizive etj., etj. "Qëllimi ynë është të ofrojmë programe studimi për të cilat ekonomia ka nevojë. Nga takimet për këshillimin e karrierës me rreth 20 mijë maturantë kemi shpjeguar rëndësinë që kanë teknologjitë informacionit dhe kemi konstatuar se interesi ka qenë përtej pritshëmive tona. Specialistët e kësaj fushe kanë më shumë shanse për të gjetur një vend pune, për të punuar ' online' për kompani të huaja si dhe për të hapur biznese vetjake", - shprehet rektori i këtij universiteti, prof. Dr. Ethem Ruka.