Skemë mashtrimi 1 mln USD me TVSH- në, bien në pranga biznesmeni dhe 3 gra
Prokuroria: Regjistruan subjekte tregtare në mënyrë fiktive, pa asnjë lloj aktiviteti Mes të akuzuarve edhe 32- vjeçarja Elsa Biba, gruaja e ndërtuesit të vrarë në 2016 në Dajt
Drejtoria e Hetimit Ta timor ka zbuluar një skemë mashtrimit me vlerë dëmi 1 milion dollarë. Sipas të dhënave zyrtare, pas një pune intensive, strukturat e Drejtorisë së Hetimit Tatimor kanë arritur të zbulojnë një skemë mashtrimi financiar me Tatimin mbi Vlerën e Shtuar ( TVSH) në sektorin e tregtisë dhe ndërtimit. Në këtë skemë janë përfshirë një numër i konsiderueshëm subjektesh tregtare, ndërsa prej kohësh prisnin fatura fiktive për të realizuar mashtrimin. Pas zbulimit të skemës është dhënë masa e arrestit me burg për biznesmenin Gjergj Fela, 43 vjeç. Ndërkohë, Gjykata e Shkallës së Parë e Tiranës ka dhënë tri arreste shtëpie për një kontabiliste, një agjente doganore dhe administratoren e kompanisë së ndërtimit "ARENI ALBANIA". Kjo e fundit është Elsa Biba, administratore e një shoqërie ndërtimi, e cila rezulton të jetë bashkëshortja e ish- ndërtuesit Vasil Biba, i vrarë në vitin 2016 në Malin e Dajtit, pasi ishte përfshirë në një skemë mashtrimi me shitjen e apartamenteve në Tiranë. Bazuar në provat e mbledhura nga hetimi, rezulton se shtetasit e mësipërm kanë regjistruar subjekte tregtare në mënyrë fiktive, pa asnjë lloj aktiviteti me qëllim tërheqjen e blloqeve të TVSH- së, duke lëshuar fatura për subjekte të treta, që më pas rimbursoheshin. Në bashkëpunim me njëritjetrin, ata kanë krijuar një skemë mashtrimi, duke i shkaktuar buxhetit të shtetit 1 milion dollarë dëm.
MASAT E SIGURISË
Pas hetimeve nga Prokuroria e Tiranës me në krye prokurorin Ndini Tavani, gjykata dha masat e sigurisë
për 4 personat e akuzuar nga Hetimi Tatimor për ngritjen e një skeme mashtrimi. Konkretisht, Gjykata e Tiranës ka vendosur masën e sigurimit "Arrest me burg" për shtetasin Gjergj Fela, 43 vjeç, administrator i subjektit "KRISTIRINA" sh. p. k; masën e sigurimit "Arrest shtëpie" për shtetasen H. M., 50 vjeçe me detyrë kontabiliste; masën e sigurimit "Arrest shtëpie" për shtetasen T. K., 53 vjeçe, me detyrë agjente doganore si dhe masën e sigurimit "Arrest shtëpie" për shtetasen E. B., 32 vjeçe, me detyrë administratore dhe ortake e vetme e shoqërisë "ARENI ALBANIA" sh. p. k. Ndaj këtyre shtetasve rëndon akuza për veprat penale të "Krijimit të skemave mashtruese lidhur me Tatimin mbi Vlerën e Shtuar" dhe "Fshehja e të ardhurave" të kryera në bashkëpunim. Strukturat hetimore kanë krijuar dyshime të arsyeshme se skema mashtruese në fushën e ndërtimit është më e gjerë dhe për këtë arsye po vijojnë hetimet.
KUSH ËSHTË ELSA BIBA
Një prej personave të akuzuar nga Drejtoria e Hetimit Tatimor për skemën e mashtrimit me vlerë 1 mln dollarë dhe që ndodhet aktualisht në arrest shtëpie është edhe Elsa Biba. Ndonëse vetë është një emër i panjohur, bashkëshorti i saj, Vasil Biba u gjet i vrarë dhe i groposur më 15 shkurt të vitit 2016 në Malin e Dajtit. 36vjeçari nga Pogradeci dhe me banim në kryeqytet ishte denoncuar i zhdukur nga bashkëshortja e tij në 16 dhjetor 2015. Ai ishte i dënuar dy herë nga gjykata shqiptare për evazion fiskal dhe për drejtim mjeti pa patentë. Ngjarja bëri bujë atë kohë, ndërsa viktima Vasil Biba dyshohet se u vra për mashtrime në fushën e ndërtimit. Pikërisht për një skemë mashtrimi me ndërtimet akuzohet edhe e shoqja e tij.