"Babalja", Basha: Të rrëzojmë mafien në pushtet. Rama: Qetësohu, kemi të reja
Audiopërgjimi për Agron Xhafajn, replika mes kryeministrit e kreut të PD Kreu i qeverisë: Autorët e pagatorët do paguajnë
Kryeministri Edi Rama lajmëroi dje kreun e opozitës se nesër do të ketë të reja për të. Pas vendimit të prokurorisë, e cila doli në përfundimin se audiopërgjimi i publikuar nga PD për vëllain e ministrit Xhafaj ishte montazh, kryeministri dhe kreu i opozitës replikuan në rrjetet sociale. Përmes një mesazhi në "Twitter", Rama përshëndeti vendimin e Prokurorisë, që kërkoi arrestimin e Albert Veliut, i njohur si "Babalja" apo dëshmitari X, Fredi Alizotit, si dhe detyrim paraqitje për gazetarin Jetmir Olldashin. Me ironi, kreu i qeverisë pohoi se shpreson që arrestimi i aktorëve të "Babale 1" të jetë fillimi dhe jo fundi i drejtësisë. "Uroj që arrestimi i aktorëve të ' Babale 1' të jetë fillimi, jo fundi i drejtësisë mbi një maskaradë të orkestruar për të llahtarisur dynjanë e rrëzuar qeverinë! Pas mjeranëve të paguar për t'u përgjuar, qëndrojnë autorë e pagatorë të këtij krimi, që duhet të paguajnë deri në fund", tha Rama. Por, më herët reagoi edhe kreu i PD- së, Lulzim Basha, i cili akuzoi Ramën se ky i fundit me këtë akt të prokurorisë i vuri flakën shtetit ligjor. Basha tha se tashmë nuk ka mbetur rrugë tjetër për të vënë banditët para përgjegjësisë, përveç rrëzimit me çdo mjet të mafies në pushtet. "Kush priste diçka tjetër nga prokuroria Rama- MarkuXhafaj- Prela është vetëm naiv. Agron Xhafaj, që i fshihej prej 5 vitesh drejtësisë me ndihmën e vëllait, u largua me urgjencë drejt Italisë, që të mos përballej me hetimin dhe akuzat që prokuroria e kapur i quan sot montim. Sot çdo shqiptar e kupton më qartë se kurrë pse Edi Ramës i duhej prokuroria nën komandën e tij. Me aktin e sotëm Rama i ka vënë zjarrin shtetit ligjor. Tani nuk ka mbetur rrugë tjetër për të vënë banditët para përgjegjësisë, përveç rrëzimit me çdo mjet të mafies në pushtet", - shkroi Basha. Krimet e Rënda ngritën akuzë për tre persona, ndërsa mes tyre ka gjetur edhe ' interpre- tuesin' e vëllait të ministrit të Brendshëm Fatmir Xhafaj, Agron Xhafaj, që ishte Fredi Alizoti. Ndërkohë, pak ditë më parë mbërriti në Ministrinë e Drejtësisë ekspertiza e laboratorit anglez mbi audiopërgjimin. Më pas, kreu i qeverisë pati edhe një reagim të dytë paralajmërues për kreun e demokratëve. "Qetësohu Lulëzim! Mos bëj nevrikun kot xhan, se s'ta ka fajin askush që e bëre SHQUP- in Kinostudio. Tani fli deri pasnesër, kur të kem ca të reja për ty e për tërë lehaqeniet e klubeve politike e mediatike, që siç dhunuan 10 ditë rresht një vajzë, dhunojnë përditë publikun shqiptar", u shpreh kreu i qeverisë. Nga selia e PD erdhi edhe reagimi zyrtar përmes Ervin Salianjit. Ai deklaroi se prokuroria vendosi se audiopërgjimi ' Xhafaj' ishte siç foli Rama. "Që ditën e parë Rama foli për audio- përgjimin se ishte i montuar dhe kështu doli. Është provuar se sa herë ka- pet në krim, Rama kap denoncuesit dhe kriminelët. Deklarimi i pafajshëm i vëllait të ministrit të Brendshëm ka qenë qëllimi i hetimit. Me urdhër të Ramës, hetimi u bë nga Xhafaj. Fakt se Xhafaj dhe Rama nuk bën ekspertizë që provonte se vëllai i tij bënte trafik droge. Edi Rama mund të paguajë, shantazhojë e blejë prokurorë dhe të shpikë aktorë, por s'do t'ia dalë që të mbulojë të vërtetën e përfshirjes së Agron Xhafajt në trafik droge", tha Salianji.